Siglir tar il cuntegn

Header

video
Nov hotel a Savognin - hotel Grava
Or da Telesguard dals 14.11.2019.
laschar ir. Durada: 2 minutas 33 Secundas.
cuntegn

Turissem Savognin survegn nov hotel

La Uffer SA da Savognin che vul bajegiar l'hotel Grava, ha survegnì la lubientscha da bajegiar. Sco quai che la Uffer SA communitgescha, cumenzan las lavurs da construcziun la primavaira 2020. L’avertura è planisada la stad 2021. Enconuschents èn er ils investiders ed il manader da l'hotel.

L'hotel Grava vegn manà da la fundaziun privata JUFA Hotels Österreich GmbH da Graz. En l’entira Europa maina l’interpresa gia dapli che 60 hotels, quel da Savognin vegn ad esser l’emprim en Svizra. Ils responsabels da l’interpresa JUFA hajan sa laschà persvader dal potenzial turistic en la regiun dal Surses, vegn l’interpresa citada en la communicaziun. Purschidas sco il Parc Ela, il Festival cultural Origen e las diversas purschidas da stad e l’enviern hajan inspirà ils responsabels da JUFA talmain, ch’els hajan fatg in contract da locaziun per ils proxims 25 onns cun l’investider da l'hotel.

Il Grischun sco chantun da turissem e Savognin sco lieu enconuschent da skis, è ina buna destinaziun per nossa gruppa en mira, ed jau crai era che la regiun charmanta cun pliras linguas ed ina colliaziun en Engiadina èn bunas premissas per noss emprim hotel en Svizra
Autur: Gerhard Wendl CEO Jufa Hotels

Era l'investider è enconuschent

L’investider da l'hotel che custa radund 19 milliuns francs è la ITW Ingenieurunternehmung AG da Balzers dal Principadi da Liechtenstein. L’interpresa haja 40 onns experientscha cun la planisaziun e realisaziun d’abitaziuns ed edifizis da mastergnanza. Tranter auter ha la firma reavert in bogn Mineral a St. Margrethen SG, ed a San Murezzan saja en planisaziun in project ensemen cun la clinica Gut.

Las premissas a Savognin èn excellentas – Savognin è forsa betg uschè enconuschent sco Arosa e Lai u auters lieus dal Grischun, ma igl è in pitschen e bel lieu da turissem cun grond potenzial, ed il pli impurtant è ch’ils responsabels al lieu vulan sviluppar enavant Savognin turisticamain
Autur: Martin Meyer Manader da fatschenta da la ITW AG
audio
Saira: Ils investiders dal nov hotel
ord Actualitad dals 14.11.2019.
laschar ir. Durada: 3 minutas 35 Secundas.

Construcziun modulara

Construì vegn l'hotel da quatter stailas da la Uffer SA, ch’è era responsabla per il mobigliament da l'hotel. Construì vegn tenor il sistem da moduls Quadrin. Gronda paisa vul l’interpresa da Savognin metter sin il bajegiar cun lain. Tant sco pussaivel duain vegnir duvrads pigns e lareschs dal Surses e dal conturn dal Parc Ela. Stgaudà duai l'hotel vegnir cun resgiadira da l’industria da laina regiunala. L'hotel vegn ad avair 75 chombras e 200 letgs cun ustaria, zona publica da wellness, fitness e locals per seminaris. Per ils uffants datti in’atgna zona per far termagls.

audio
Mezdi: Hotel Grava – Intervista cun Enrico Uffer
ord Actualitad dals 14.11.2019.
laschar ir. Durada: 4 minutas 9 Secundas.

RR novitads 06:00

Artitgels legids il pli savens