Suenter esser stà sis onns en uffizi, ha Luzi Thomann dà giu ses post en il cussegl d'administraziun da la Turissem Val Surses Savognin Bivio SA, a chaschun da la radunanza da delegads. Sco nov president han ils preschents elegì Luzius Wirth da Baar ch'è da preschent CEO d'ina interpresa internaziunala. L'um da 51 onns ha a Savognin ina chasa da vacanzas, ed è uschia collià cun il Surses.
Occupads èn era vegnids ils ulteriurs tschintg posts en il cussegl administrativ. Vicepresident daventa Domenico Bergamin da Lai. Dal vegl cussegl d'administraziun cuntinuescha sulettamain Gregor Vellacher. El represchenta la vischnanca da Surses en il gremi da turissem regiunal. Novs commembers dal cussegl d'administraziun èn: Janine Arpagaus, Lothar Künzli, Curdin Baltermia e Cynthia Stämpfli. La perioda d'uffizi cuzza medemamain in onn.
Luzius Wirth presidiescha la societad anonima da turissem
Luzius Wirth è vegnì proponì ed elegì sco president dal cussegl d'administraziun. L'elecziun formala dal president n'è betg succedida entras la radunanza generala sezza. Il presidi vegn constituì pir suenter la radunanza generala dal cussegl d'administraziun nov, e vegn elegì da ses ravugl.
La directura banduna l'organisaziun
Tar l’organisaziun da turissem dal Surses datti anc in’autra midada il proxim temp. La directura Tanja Amacher ch’è dapi quasi indesch onns en uffizi, chala sin la fin da favrer 2026. Questa plazza n’è betg anc scritta ora, quai pudess succeder anc quest onn suenter ch’il nov cussegl d’administraziun è elegì.
