Ils Dis dal film mundial a Tusaun èn stads in success. Sco Flurina Badel declera, hajan ins puspè cuntanschì cifras sco avant corona – passa 4'000 entradas. E betg be a Tusaun, era las represchentaziuns en auters Lieus hajan gì blers aspectaturs. Cunzunt ils events cun purschidas supplementaras sco per exempel a Lavin cun ina tschaina èn stads dumandads.
Suenter che l'anniversari radund dals Dis dal film mundial avant trais onns è stà en la sumbriva da la pandemia, festivescha il festival quest onn ses 33avel anniversari e prenda il dumber unifurm sco chaschun per guardar enavos sin l'atgna istorgia. L'onn 1991 n'ha anc nagin supponì ch'il pli grond ed impurtant festival da film en Grischun vegn a s'etablir cun ils Dis da film mundial en il pitschen Kino Raetia a Tusaun. Tut era atgnamain mo pensà sco eveniment unic: en il rom da la festa da 700 onns Svizra, sut il motto «Solidaritad internaziunala». Las reacziuns sin quest emprim «Festival da film 91» èn però stadas uschè positivas ed en il meglier senn «persistentas» – ch'in pèr freaks da films da la regiun han simplamain fatg vinavant, fin oz.
La furmla da success saja restada la medema, scrivan ils organisaturs en lur communicaziun: a Tusaun vegnan mussads films da tut il mund ch'èn vegnids realisads lunsch davent dal mainstream dals Stadis Unids. Ils films mussads vegnan cumplettads cun discurs da film cun reschissuras e reschissurs. Ultra da quai datti adina avant il festival, ina turnea da kino ambulant a travers las regiuns las pli perifericas dal Grischun.
Cronica multimediala
Cun la cronica «33 onns Dis dal film mundial a Tusaun», ina show da dia cun maletgs dals trais decennis passads, cun ina prelecziun e cun in concert cun la band da saut balcanica «Otrava» – festivescha il festival ses anniversari betg pli dal tut radund. En il center stat dentant era quest onn sco usità il program dal festival cun 38 films da 5 continents, ch'èn da vesair en il Kino Raetia nua ch’era cineastas e cineasts da tut il mund èn puspè da giast.
Tematicamain datti numerus films che raquintan «d'identitad»: glieud giuvna a la tschertga da las atgnas ragischs. La generaziun da geniturs è morta, absenta u s'interessescha betg propi per il destin dals agens uffants. Sco adina vegn in focus er mess sin films da territoris da crisa politica sco la Siria, l'Afganistan u il Jemen – tut films documentars u fictivs che surpassan l'actualitad dal di e che raquintan insatge pli profund davart ils motivs dals conflicts.
Culinaricamain datti in viadi cun spaisas dals films mussads al festival, quai en la KinoBeiz en il restaurant «Schäfli». Ed en KinoBistro gist visavi il kino datti ina bar cun bavrondas e marendinas ed atmosfera patgifica per digerir ils films.
La prevendita dals bigliets è gia lantschada. Per mintga preschentaziun datti in contingent da bigliets tar la cassa dal di. I dat era in pass dal festival.
