Als Dis dal film mundial a Tusaun ch'han cumenzà il prim da november èn ids a fin dumengia, han ins pudì beneventar 3'500 visitaders e visitadras, tranter quels er entiras classas da scola. Cumpareglià cun l'onn passà sajan quai 1'000 entradas dapli. Però anc adina pli paucs ch'avant la pandemia. Quai scrivan ils organisaturs en ina communicaziun.
Giasts internaziunals
In dals puncts culminants dal program dals 32avels Dis dal film mundial a Tusaun sajan stads ils films ed ils giasts da l'Iran. Il reschissur e l'autura dad «Apple Day» han discurrì davart il film davant il public. Omadus ston temair da vegnir mess en praschun en l'Iran.
En tut han ins pudì guardar en il Kino Rätia a Tusaun 40 films da quatter continents. Ils proxims Dis dal film mundial cumenzan ils 31 d'october 2023.