La situaziun tar la URGC è actualmain tendida. La co-presidenta Gierina Michael vul atgnamain far enavant mo sco co-presidenta, hai gì num a la radunanza generala da mardi saira. Ma la segunda co-presidenta manca il mument, perquai che Simona Demarmels ha dà giu il co-presidi da la URGC, perquai ch’ella lavura ussa sco promotura regiunala per la Lia Rumantscha, e vul uschia evitar conflicts d’interess. Perquai ch’il cassier Flavio Guetg ha era dà giu il post manca il mument in cassier, quella lavur fa il mument Patric Vincenz, che fa part a la suprastanza da la Lia Rumantscha. El n’è dentant betg part da la suprastanza da la URGC. Quella consista il mument mo da persunas da la Sutselva. Tenor ils statuts stuessan però duas persunas derivar dal Surmeir. Rico Michael, il suprastant da la URGC ha ditg ch’ins saja anc adina a la tschertga da candidatas u candidats per la suprastanza.
Midadas structuralas
Urezza Famos, co-presidenta da la Lia Rumantscha, di dentant che structuras fixas na funcziunian betg pli sco pli baud. Ella metta en discussiun novas structuras: «La glieud ha interess da lavurar vi da projects, betg pli da star en structuras.» La Lia Rumantscha vul preschentar propostas da midadas structuralas per uniuns che promovan il rumantsch, e quai a sia radunanza generala dals 21 da zercladur a Turitg. L’idea è da reponderar models d’organisaziun – e dad adattar quel als basegns d’ozendi. Per la UGC pudess quai manar a midadas fundamentalas.
-
Bild 1 von 3. Rico Michael gratulescha a Simona Demarmels e Flavio Guetg ch'èn stads quatter onns en suprastanza da la URGC. Bildquelle: RTR.
-
Bild 2 von 3. Da san.: Mathias Kunfermann, Sched, actuar URGC, Rico Michael, Andeer, suprastant URGC, Simona Demarmels, anteriura co-presidenta URGC, Flavio Guetg, anteriur cassier URGC. Bildquelle: RTR.
-
Bild 3 von 3. Da san.: Patric Vincenz, Lia Rumantscha, Mathias Kunfermann, URGC, Rico Michael, URGC, Simona Demarmels, anteriura co-presidenta URGC, Urezza Famos, co-presidenta Lia Rumantscha, Flavio Guetg, anteriur cassier URGC. Bildquelle: RTR.
Il rumantsch duess viver vinavant
Tuttina resta cler: la lavur da promover il rumantsch sto cuntinuar – e quai er sch’i na dat betg ina structura perfetga. «Impurtant è che la lingua rumantscha viva vinavant – er sche quai è magari senza la URGC», di Rico Michael.