Maurin Malär è cun ses 31 onns in president communal fitg giuven. Il manager d'events ha avant trais onns fatg il meglier resultat per il cussegl communal da Vaz. Plinavant è el bain collià en il turissem. Quai è fitg impurtant per la vischnanca. Ma er sch'el vegn da quella branscha, na munta quai betg chi vegnia ussa guardà pli pauc sin la detta als turistichers.
Ina da sias prioritads sco president communal vegnia ad esser da stgaffir spazi da viver per indigens. Quai saja ina sfida – tranter auter er en vista da la planisaziun dal territori.
L'introducziun en ses uffzi saja stada – davart dal president partent – exemplarica, raquinta Maurin Malär. El vul dar gas. El è dentant er conscient ch'ils mulins politics molan pli plaun. Ed uschia sappia el che sia pazienza vegnia a vegnir testada. Impurtant è ad el che decisiuns vegnian purtadas da la maioritad e che l'argumentaziun è clera. Uschia vegnia el a dar bler pais sin la communicaziun.
