Il quint dal 2021 da la vischnanca da Vaz serra cun in gudogn da 5,7 milliuns francs, tar entradas da 51,5 milliuns francs. Il cussegl communal ha approvà il quint che serra meglier che budgetà. Las entradas da taglia èn tar 22,4 milliuns francs ed uschia dus milliuns pli autas ch’il preventiv.
Plinavant ha il cussegl communal decidì, da betg registrar il tun da las sesidas dal cussegl communal. Quellas vegnan en l’avegnir vinavant protocolladas.
Sco persuna cun vusch consultativa per la cumissiun da bajegiar è vegnì elegì l’architect Marcel Liesch . El è creschì si a Brinzauls e maina in biro d’architectura a Cuira. La cumissiun da bajegiar vegn manada da Thomas Parpan.
A la suprastanza è vegnì inoltrà in postulat suttascrit dad otg persunas ch’appartegnan al parlament. Il postulat pretenda da reducir il tempo cunzunt per las vias da quartier e las vias lateralas sin 30 kilometers per ura.
A la sesida dal cussegl communal è plinavant vegnì ditg adia a Marcus Lenz. El ha presidià ils davos onns la vischnanca burgaisa da Vaz.
Sut varia ha il president communal da Vaz communitgà che la vischnanca da Zollikon vegnia proximamain a decider sch’el veglia vender il terren a Sanaspans ad in interessent da Cuira. Zollikon n’haja nagin interess pli da far diever dal terren da bajegiar sco previs in hotel a Sanaspans. Là posseda la vischnanca turitgaisa gia blers onns ina chasa per champs da vacanzas.
Legenda:
Sin vias lateralas pudessi en l'avegnir dar tempo 30.
mad
Legenda:
Marcus Lenz (san.), il president partent da la vischnanca burgaisa da Vaz, retschaiva in regal da Maurin Malär, il president communal da Vaz.
Gion Nutegn Stgier
