Siglir tar il cuntegn

Header

Pervi dal na da Curvalda na datti nagina lescha da turissem cuminaivla.
Legenda: Pervi dal na da Curvalda na datti nagina lescha da turissem cuminaivla. RTR, Federico Belotti
cuntegn

Vaz / Lantsch / Curvalda Naufragi da la lescha da turissem unifitgada

Suenter il na da Curvalda na datti betg ina lescha cuminaivla per la destinaziun Lai. Morta è l’idea però betg. Malgrà il na da Curvalda vul Lantsch introducir la lescha sin l’entschatta da l’auter onn. Ed er a Vaz èn ins anc da buna speranza che la nova lescha pudess vegnir acceptada a l’urna.

Curvalda di cleramain «na»

Cun 97:52 vuschs ha la radunanza communala da Curvalda refusà la nova lescha da turissem cuminaivla, che fiss stada previsa per l’entira regiun da vacanzas da Lai.

Margrith Raschein, la presidenta communala da Curvalda, ha ditg ch’ella deploreschia quest cler resultat. Da returnar cun l'affar davant la radunanza communala na saja per ella perquai nagin tema pli. Ussa saja da guardar co ch’ins possia finanziar il turissem en l’avegnir. Cun la nova lescha sperava ella da pudair distgargiar las expensas da la vischnanca.

Lantsch percunter di «gea»

Lantsch ha era gia decidì: Cun 23:9 vuschs è la lescha nova vegnida acceptada. 230'000 francs dapli ch’enfin uss quinta la vischnanca da pudair generar cun la lescha nova. Da preschent datti 340'000 francs ad onn or da la taxa da cura.

Tar la taxa per promover il turissem, ch’ils impressaris indigens han da pajar, vegn la summa a s’augmentar per 6'000 francs sin 49'000 francs.

Vaz pretenda midadas

Cuntrari a Lantsch, sto Vaz anc surlavurar in pèr puncts. Durant la davosa seduta ha il cussegl communal pretendì, che la suprastanza va anc ina giada sur ils cudeschs.

Uschia vul il cussegl communal che las taxas dals alloschis da gruppas e manaschis commerzials e mastergnants vegnan adattads, e plinavant vul il cussegl savair cun tge entradas supplementaras ch’i saja da quintar grazia la nova lescha.

RTR actualitad 12:00

Artitgels legids il pli savens

Scrollar a sanestra Scrollar a dretga