A partir dals 28 d’october fin tar la midada da l’urari dal mez da december, curseschian mo pli quatter trens per direcziun. Il rest vegn manà cun autos da posta pervi da mancanza da locomotivistas e locomotivists.
Sco quai ch’il pledader da la Viafier retica, Simon Rageth, ha ditg sin dumonda dad RTR, examineschan ins uss co che quest sbagl haja pudì capitar. Ils uraris publitgads vegnian proximamain midads ora cun l’agiunta che l’urari saja adattà. Cun la midada da l’urari il mez da december quinta Rageth che tut ils 15 trens per mintga direcziun possian puspè cursar sin la lingia da tren. Quest onn fineschian numnadamain var 50 locomotivistas e locomotivists lur scolaziun.
Birgit Ottmer da Filisur aveva atgnamain anc sa legrà che l’urari actual valia fin il december, e betg mo fin la fin d’october.
L’urari per l’atun è franc bler meglier che quai ch’igl è vegnì annunzià il favrer. El risguardà ils basegns ils pli impurtants dals pendularis e scolars.
L'urari saja dentant anc lunsch davent dals 15 trens ch'èn en l’urari. Er saja el lunsch davent dals otg trens communitgads sbagliadamain tar las staziuns.
