La vischnanca d’Albula/Alvra ha approvà il credit da 10,5 milliuns francs per il project per ina gallaria da sondagi a Brinzauls. Quai cun 152 cunter 40 vuschs. La participaziun a l'urna era tar 19,74%.
La vischnanca quintava cun custs da passa 7,8 milliuns, ussa sa movan ils custs dentant tar 10,5 milliuns. Ils custs per il project èn uschia s’augmentads per 35%. En il rom da la planisaziun da detagl han ins constatà ch'il preventiv dal prim project na tanscheva betg. Cun scuvrir dapli davart dal fundament e pussaivlas cumplicaziuns, han ins ussa stuì adattar il credit.
Repartiziun dals custs
90% dals custs surpiglia la Confederaziun ed il chantun, il rest vegn finanzià da la vischnanca, da l’Uffizi da construcziun bassa, da la Viafier retica e dad auters partenaris che profiteschan da la gallaria da sondagi a Brinzauls. Quella gallaria duess avair ina lunghezza da passa 600 meters.
Ulteriuras fatschentas
Tranter auter ha la vischnanca d’Albula/Alvra era detg Gea al project da servetsch da preavertiment 2021 fin 2024 en l'autezza da 2'420'000 francs. Plinavant ha il suveran approvà il preventiv 2021 ed è d'accord a laschar il pè da taglia tar 100% da la taglia chantunala simpla.
