En tut èn sa participads a l’occurrenza tschintg biros d’architectura. Tenor la giuria persvada la contribuziun da la «Laterne» tras sia simplicitad. La concepziun e las Intervenziuns minimalas en la substanza architectonica da la Tgea da Schons sajan intgins dals avantatgs dal project, scriva la fundaziun en ina communicaziun.
Situaziun actuala na cuntenta betg
Tenor la Fundaziun tgea da Schons saja la situaziun actuala betg ideala, ha ditg sin dumonda dad RTR Regula Götte, la presidenta da la fundaziun. Las dapli che 15’000 persunas che visitian mintg’onn la baselgia renumada Sontg Martin cun ses palantschieu sura stoppian cumprar lur bigliets d’entrada en ina chasina provisorica nua ch’ils indrezs sanitars sa chattian. Da nov pudessan ils bigliets vegnir cumprads en la Tgea da Schons, il museum da vischnanca actual. Quel duess survegnir in bajetg annex. Là nua ch’igl ha ussa in clavà che vegniss destruì. L’exposiziun che declera il palantschieu sura da la baselgia vegniss da nov translocada en quest nov bajetg annex da la Tgea da Schons. Actualmain è l’exposiziun en la chasa communala. Il spazi che vegniss liber en la chasa communala pudess vegnir duvrà per realisar dus abitaziuns, di Regula Götte.
Anc mancan ils daners
Il nov bajetg annex da la Tgea da Schons duess survegnir in café, e sin il plaun sisum duessi dar ina sala per occurrenzas culturalas. Il bajetg vegniss collià cun il museum Tgea da Schons. La fundaziun Tgea da Schons quinta cun custs da 3.4 – 3.7 milliuns francs. Ins saja actualmain vi dal rimnar daners, la finanziaziun na saja betg anc garantida ha ditg Regula Götte. L’intent saja da realisar il project l’onn 2025 e 2026.
Exposiziun da tut ils projects inoltrads
Dapli infurmaziuns datti venderdi, l’emprim da mars: las set la seira orientescha la fundaziun Tgea da Schons davart l’occurrenza da project. E la fin d’emna, pon il suentermezdi mintgamai da l’ina fin las tschintg vegnir contemplads ils tschintg projects d’architectura ch’èn vegnids preschentads. E quai en la chasasa communala da Ziràn.
