Kaspar Howald è il nov mainaproject da Grischun Cultura. Quai scriva l'uniun en ina communicaziun a las medias. Sia nova funcziun sco mainaproject surpiglia Kaspar Howald a partir dal matg 2024. L'um da 48 onns ch'è oriund da Trimmis è dapi l'onn 2014 directur da Valposchiavo Turismo.
Grischun Cultura è in'uniun sustegnida dal chantun cun la finamira da posiziunar il Grischun sco ina da las regiuns turisticas da cultura principalas en las alps. Principalmain duain vegnir rinforzà la collavuraziun tranter cultura e turissem ed uschia sviluppa ina purschida attractiva da cultura en il chantun Grischun. Il project che vegn sustegnì dal chantun per ils onns 2023–2026 sa concentrescha sin la valurisaziun turistica da la cultura multifara en ils trais spazis linguistics e da viver dal Grischun. En la collavuraziun sa dattan novas experientschas per osps sco per indigens.
A l'uniun Grischun Cultura fa part l'Institut grischun per la perscrutaziun da la cultura, l'uniun Grischun vacanzas, il post da gestiun da la marca grischun ed il post da perscrutaziun per il turissem e per il svilup ZHAW Wergenstein.
