Per persunas minorennas sin la fugia betg accumpagnads, che vivan il mument en il Grischun quinta il chantun l'onn proxim cun custs da radund 350'000 francs. Quests daners dovria per assister e per dar suttetg als fugitivs minorens, sco il chantun communitgescha.
Plinavant ha la regenza grischuna approvà las cunvegnas da prestaziun cun la Casa Depuoz a Trun, e la fundaziun Gott hilft a Zezras, per l'alloschi e l'assistenza dals fugitivs minorens. Omaduas cunvegnas da prestaziun èn valaivlas da l’emprim da schaner 2024 fin ils 31 da december 2026.
Gia dapi l'onn 2020 existan cunvegnas da prestaziun cun l'uniun «Casa Depuoz» e cun la fundaziun «Gott hilft» per la collocaziun d'uffants e da giuvenils sin fugia e betg accumpagnad. Las duas cunvegnas da prestaziun actualas eran vegnidas elavuradas sin basa da la situaziun da quella giada, cura che paucas persunas minorennas betg accumpagnadas vegnivan attribuidas al chantun Grischun.
Dapi la fin da l'onn 2022 vegnan però attribuidas al chantun dapli persunas minorennas betg accumpagnadas. Cun agid da l'uniun «Casa Depuoz», da la fundaziun «Gott hilft» e d'ulteriurs furniturs da prestaziuns duain las novas cunvegnas da prestaziun metter a disposiziun ina purschida d'abitar e d'accumpagnament ch'è d'ina vart adattada al basegn e che sustegna da l'autra vart l'integraziun sociala ed economica da las persunas pertutgadas.
