Siglir tar il cuntegn

Header

video
Co s'adattar a la stgaudada dal clima
Or da Telesguard dals 24.05.2023.
laschar ir. Durada: 3 minutas 18 Secundas.
cuntegn

Grischun Vacanzas Co s'adattar al stgaudament dal clima?

Sa radunads èn ils turistichers a Valbella per salvar la 25avla radunanza generala da Grischun Vacanzas. Meteorolog Thomas Bucheli ha infurmà ils turistichers tge che spetga il turissem ils proxims envierns.

Tge spetga ils turistichers e lur osps suenter quest enviern miaivel cun pauca naiv? Per sclerir quai ha Grischun Vacanzas envidà il meterolog Thomas Bucheli. Quel ha resumà uschia: Temperaturas pli chaudas durant l'entir onn, stads pli sitgas ed in zic dapli plievgia u naiv durant l'enviern, quai sajan scenaris pussaivels.

El di ch'i vegn precar per ir cun skis sut 1'500 meters sur mar. Ch'i dettia dapli plievgia u naiv possia er esser ina schanza. Bucheli prognostitgescha dentant er ch'i vegn a dar problems cun producir naiv artificiala, damai che las temperaturas creschan e ch'i po mancar l'aua per producir.

audio
Thomas Bucheli: «Il cunfin da naiv vegn a crescher»
ord Actualitad dals 25.05.2023. Maletg: RTR
laschar ir. Durada: 3 minutas 53 Secundas.

Il directur da las pendicularas Andermatt Sedrun Silvio Schmid è dentant optimistic: I saja simplamain da nizzegiar il temp fraid optimalamain. E lura giaja er anc da far sport d'enviern en 10 u 20 onns. Intgins vesan schanzas en connex cun il stgaudament dal clima. Sch'i saja memia chaud en la Bassa e sper la mar lura profiteschia il Grischun, di il cusseglier guvernativ Marcus Caduff.

Cifras davart il turissem

L’onn 2022 saja stà in onn da vaglia or da vista turistica, ha la vicepresidenta Irene Ryser-Müller punctuà. Müller-Ryser ha manà la radunanza perquai ch'il president Jürg Schmid n’ha per raschuns da sanadad betg  pudì esser preschent. Ryser-Müller è a lunga vista da buna speranza per il futur dal turissem grischun. Gronda speranza fa a Müller l’acziun da reclama e promoziun per il Grischun sco destinaziun da vacanzas en la Svizra romanda.

Martin Vincenz, il directur da Grischun Vacanzas è cuntent cun las cifras da l’onn turistic 2022. Cun 5,57 milliuns pernottaziuns en la hotellaria ha quella gì il meglier onn dapi l’onn 2010. Il dumber da las pernottaziuns è uschia s’augmentà en cumparaziun cun l’onn precedent per 8%. Pernottà en hotels grischuns han l’onn passà cunzunt dapli giasts da l’exteriur, cunzunt da la Germania (plus da 38 %) e da la Gronda Britannia (plus da 43 %).

En Svizra, a la testa cun il pli aut dumber da pernottaziuns, è stà il Grischun cun 5,57 milliuns pernottaziuns, suandà dal chantun Berna cun 5,25 milliuns pernottaziuns. Per far ina cumparaziun: il Tirol en l’Austria ha fatg l’onn passà 26 milliuns pernottaziuns ed il Tirol dal Sid 22 milliuns pernottaziuns. En l’avegnir vul Grischun Vacanzas dar en general dapli paisa a la persistenza. A partir dal zercladur vegn ina persuna da l’organisaziun a s’occupar pli ferm be cun la persistenza.

30% da la creaziun da valur vegn dal turissem

Stada represchentada a la radunanza generala da Grischun Vacanzas è la regenza grischuna entras cusseglier guvernativ Marcus Caduff. Il schef dal departament da l’economia publica ha fatg attent a l’impurtanza dal turissem en noss chantun. Caduff ha ditg che 30 % da la creaziun da valur deriva en il Grischun dal turissem. Il cusseglier guvernativ lumnezian giavischa e pretenda da tuts exponents turistics resistenza e capacitad da s’adattar. «Impurtant è en buns temps da betg daventar negligent», ha ditg Caduff. Perseveranza na dastga betg mancar als turistichers per avair success. Ultra da quai duessan quels er far pli attractiv lur plazzas da lavur, ha ditg Caduff.

RTR Telesguard 17:40

Artitgels legids il pli savens