L'emprima giada realisà ch'ella ha plaschair vi dal giugar teater ha Annina Hunziker cun 10 onns tar in teater d'uffants durant las vacanzas. Suenter ch'insatgi aveva lura ditg a la giuvna matta che «actura» saja er ina professiun – saja per ella stà cler ch'ella vegnia a far quai. Da pudair gudagnar ses raps a maun da sia passiun – quai ha tunà d'in siemi e perquai ha ella enfin oz anc mai mess en dumonda quella via professiunala.
Jau n'hai mai mess en dumonda quai, igl era cler da bell'entschatta.
Annina Hunziker è creschida si a Laax e Cuira. Durant sia uffanza e sco giuvenila ha ella adina giugà en differents tocs da teater. Suenter il gimnasi ha ella studegià scienzas da teater e film – e sinaquai fatg il studi d'actura a Vienna. Oz tutga la dunna da 32 onns tar l'ensemble dal Teater Lucerna, nua ch'ella viva era.
Il pass davant la camera ha duvrà curaschi...
Il teater saja ses dachasa, di Annina Hunziker – ma cun sia rolla sco «Ladina Cadonau» en la seria «L'Ultim Rumantsch» ha ella era ristgà il pass davant la camera. Per ella saja quai vairamain stà in grond pass che haja duvrà curaschi – ma ella haja emprendì ch'i renda en sia professiun da far exact quels pass che fan tema.
Ed uschia saja quai era stà tar il pass davant la camera. Ella haja scuvert ina cumplettamain autra moda e maniera da giugar, ch'ella saja enorm cuntenta d'avair scuvert.
...e purtà in premi
E per sia carriera è quest pass davant la camera era stà d'avantatg. Dapi lura enconuscha ella in bler pli grond public – quai che saja tenor la cumissiun da cultura da Cuira era stà in dals facturs daco ch'ella è, l'entschatta d'avust, stada ina da sis persunas ch'èn vegnidas premiadas da la citad da Cuira per lur lavur culturala. Per l'actura en mintga cas ina conferma, che la glieud vesa sia lavur ed haja plaschair vidlonder – ma vi da la motivaziun n'haja quai midà nagut. Ella saja gia avant il premi stada pli che motivada.
