Marcus Caduff e l'entira regenza grischuna fan quitads che questa guerra pudess avair consequenzas per il Grischun. «Jau pens che questa situaziun sa quietescha betg uschè svelt.» Perquai ch'ils pretschs d'ieli creschan, ston las pli differentas interpresas pajar dapli per la producziun da lur products. En consequenza stoppian lura las consumantas ed ils consumants pajar dapli – la vita vegniss pli chara.
Sche questa situaziun cuntinuescha, fa quai schon quitads che l'economia grischuna percorscha lura las consequenzas.
Marcus Caduff enconuscha il Proxim Orient. Ils onns 2000 enfin 2002 ha il Lumnezian abità a Dubai ed en il Sid da l’Iran. El ha lavurà per ina interpresa da logistica aviatica. Tranter auter coordinava el sgols da lavurents e material per ils champs da petroli.
La situaziun enturn Dubai era gia lura magari fragila.
Uschia persequitescha Marcus Caduff era or d’agen interess la situaziun en il Proxim Orient. El è persvas, che pli ditg che la guerra va e pli gronda che la probabilitad è ch'il Grischun vegn a badar las consequenzas da quella.
Samignun: in tancadi cun pretschs pli bun martgads
Pervia da la guerra è il pretsch d'ieli e gas ì fermamain ensi. Quai ha er in effect sin il benzin ed il diesel, quai percorschan automobilistas ed automobilists actualmain. En il Samignun è il tancar però anc adina pli bun martgà ch'en il rest dal chantun. La val cun sia zona da dazis libers ha in status spezial. Sper ils clients regulars tancheschian cunzunt automobilistas ed automobilists da l'Italia e l'Austria en il Samignun.
