Cuira è la pli veglia citad da la Svizra, quai sch’ins guarda sin las exchavaziuns che derivan da 11’000 onns avant Cristus. Durant duas uras maina Imelda Grisch la gruppa atras la citad veglia. Ella è oriundamain da Casti e fa dapi 31 onns guidas per Cuira turissem. Questa giada prendan part duas persunas: ina mamma e figlia da la citad La Paz, en Bolivia. La mamma, Tanja Lorini, è gia ina giada stada a Cuira e questa giada vuleva ella vegnir a savair dapli cun ina guida. Normalmain prendan part 5 fin 10 persunas.
-
Bild 1 von 2. Quai è la gruppa da la guida: la mamma e figlia Tanja e Luana Lorini da Bolivia a dretga ed Imelda Grisch che fa la guida a sanestra. Bildquelle: RTR.
-
Bild 2 von 2. Qua sin la pli bella plazza da Cuira tenor Imelda Grisch, l'Arcas. Bildquelle: RTR.
Imelda Grisch stat adina puspè airi e raquinta intginas frasas davart in toc d’art ch’ins vesa, davart ils nums da las vias u in'interessanta chasa. La guida va duas uras, perquai chamina la gruppa magari svelt atras la citad veglia. Sch’ella stat airi, lura savens en la sumbriva cunquai ch’il sulegl da mezdi è ferm.
-
Bild 1 von 2. La chasa da la dretgira superiura en la Poststrasse era pli baud la chasa d'abitar da la famiglia bainstanta von Salis. En il plaun giudim ha Peter von Salis beneventà giasts, en l'emprim plaun ha el abità cun sia famiglia e sin il plaun sisum cun las fanestras pitschnas avevan ils serviturs e servientas lur stanzas. Bildquelle: RTR.
-
Bild 2 von 2. Da l'autra vart da la chasa da la famiglia von Salis era lur iert, uss il parc da Fontana cun bleras radiellas. Quest crap en furma d'ina capella era in regal d'anniversari per sia dunna. Il crap da la vart dretga è il crap da fossa da la dunna da Peter von Salis. Bildquelle: RTR.
Sia savida davart la citad da Cuira ha Imelda Grisch rimnà sin basa da cudeschs da la biblioteca – per exempel ch'igl ha dà circa 20 incendis gronds a Cuira. Imelda Grisch fa 60 enfin 70 guidas ad onn e quai ord spira passiun.
-
Bild 1 von 3. A l'ur da la citad veglia, sper la curt episcopala datti anc in sguard sin la Scola chantunala dal Grischun. Era là vesa Imelda Grisch art ch'ella explitgescha. Bildquelle: RTR.
-
Bild 2 von 3. Suenter datti ina visita en la catedrala en il frestg. Bildquelle: RTR.
-
Bild 3 von 3. Er en chantuns da la catedrala nua ch'ins po entrar mo cun ina clav. Qua sper l'altar nua ch'ils banchins èn segirads cun in alarm. Bildquelle: RTR.
Per las duas visitadras da la Bolivia è la citad Cuira insatge spezial. La figlia Luana Lorini di, che l’architectura è dal tuttafatg differenta. En lur citad La Paz abitan passa 700’000 persunas, uschia ch’ella ha l’impressiun che la vita funcziuna differentamain en Svizra.
-
Bild 1 von 2. L'ura sin il clutger da la baselgia Martin ha il segund pli grond plat da l'ura en Svizra. Bildquelle: RTR.
-
Bild 2 von 2. Sin il tschiel sura da la baselgia Martin stat ina cifra: 1894 – tar l'otger è dentant mo scrit la mesadad – pia quatter. Uschia che la cifra correcta fiss 1491. Bildquelle: RTR.