Il potenzial da resursas decisiv per l’onn da gulivaziun 2024 è s’augmentà per 21,4 milliuns sin 870,2 milliuns francs (+2,5%). La raschun principala da l’augment sajan entradas da taglia pli grondas. Las taglias da persunas privatas fan or cun 595,2 milliuns u prest 68% ina buna part dal potenzial da resursas. Ultra da quai vegnan tiers las taglias da persunas giuridicas (94,5 milliuns), ils tschains d'aua ed indemnisaziuns (51,6 milliuns) sco er ils 1,5 promils valurs da taglias sin immobiglias (128,8 milliuns).
Radund 35,5 milliuns vegnan da la gulivaziun da resursas
Il potenzial da resursas per persuna en Grischun è actualmain tar 4'109 francs (+1,6% cumpareglià cun l'onn passà). Questa valur media correspunda a 100 puncts sin l'index da resursas. Farera sco pli ferma vischnanca ha cun 17'354 francs per persuna in stan da 422,4 puncts sin l'index (l'onn avant 524,2 puncts). Flerden sco nov la pli flaivla vischnanca ha cun 1'834 francs per persuna 44,6 puncts sin l'index. Farera è uschia circa 10 giadas pli ferma che Flerden.
Cun valurs da dapli che 100 puncts sin l'index, valan 38 vischnancas en Grischun sco fermas e cun quai sco vischnancas che han da contribuir. Las contribuziuns che quellas vischnancas pajan, muntan a 23 milliuns francs. Las 62 vischnancas che han pli pauc che 100 puncts e valan sco flaivlas, survegnan total 35,5 milliuns francs e cunquai 0,5 milliuns francs dapli che l'onn passà. Ensemen cun las atgnas resursas cuntanscha uschia mintga vischnanca ina dotaziun minimala da 71% da la media chantunala. La differenza da la summa che las vischnancas han da bun e las autras han da pajar, munta a 12,6 milliuns francs. Quels paja il chantun.
49 vischnancas profiteschan da gulivaziun da muntogna e da scola
Cun la gulivaziun da las grevezzas geografic- topograficas e da scola survegnan vischnancas che han in dischavantatg pervi da quellas ina gulivaziun. L'onn proxim è quai il cas tar 49 vischnancas che survegnan total 25 milliuns francs. Questa summa metta il chantun a disposiziun. La gronda part da quella summa vegn investida en vischnancas en Surselva e Viamala.
12 vischnancas han da bun agid pervi da l'agid social
Vischnancas ch'èn pertutgadas surproporziunalmain da l'agid social, pon s'annunziar per survegnir ina gulivaziun. Questa gulivaziun mesiran ins vi da las expensas nettas da las vischnancas en relaziun cun il potenzial da resursas. La summa da gulivaziun vegn resguardada mintgamai per l'onn che vegn.
Suenter che las dumondas dal 2022 èn vegnidas resguardadas, vegnan pajadas prestaziuns da total 351'000 francs a 12 vischnancas (l'onn passà 2,4 milliuns francs). In motiv per questa reducziun saja er ina midada da finanziaziun che vala dapi l'onn 2022 en il sectur da las mesiras staziunaras da la protecziun d'uffants. Tar quatter vischnancas vegn examinà pli detagliadamain la dumonda – qua sa tracti d'ina controlla sporadica.
Dal rest po la regenza conceder ina contribuziun speziala ad ina vischnanca en il rom da la gulivaziun individuala d'inegualitads per grevezzas spezialas. La vischnanca sto cumprovar ch'ella ha ina grevezza surproporziunala pervia da relaziuns u pervia d'eveniments extraordinaris. Dapi l'introducziun da la nova gulivaziun da finanzas l'onn 2016 n'han ins anc mai stuì far diever da quest instrument. Per l'onn 2024 duai, sco per l'onn precedent, vegnir budgetada ina contribuziun da 0,5 milliuns francs.
Il Cussegl grond vegn a fixar las valurs directivas per la gulivaziun da finanzas 2024 ensemen cun il preventiv dal 2024.
