Il potenzial da resursas decisiv per l’onn da gulivaziun 2023 è s’augmentà per 10,8 milliuns francs sin 848,7 milliuns francs (+1,3%). Motivs per l’augment sajan cunzunt entradas da taglia pli grondas. Las taglias da persunas privatas fan or cun 579,8 milliuns u prest 68% ina buna part dal potenzial da resursas. Ultra da quai vegnan tiers las taglias da persunas giuridicas (86,7 milliuns), ils tschains d'aua ed indemnisaziuns (60 milliuns) sco er ils 1,5 promils valurs da taglias sin immobiglias (122,2 milliuns).
Radund 35 milliuns vegnan da la gulivaziun da resursas
Il potenzial da resursas per persuna en Grischun è actualmain tar 4'043 francs. Questa valur media, correspunda a 100 puncts sin l'index da resursas. Farera sco pli ferma vischnanca ha cun 21'194 francs per persuna in stan da 524,2 puncts sin l'index. Furna sco pli flaivla vischnanca ha cun 1'586 francs per persuna 39,2 puncts sin l'index. Farera è uschia 13 giadas pli ferma che Furna.
Cun valurs da dapli che 100 puncts sin l'index, valan 39 vischnancas en Grischun sco fermas e cun quai sco vischnancas che han da contribuir. Las contribuziuns che quellas vischnancas pajan, muntan a 21,1 milliuns francs. Las 61 vischnancas che han pli pauc che 100 puncts e valan sco flaivlas, survegnan total 35 milliuns francs. La differenza da la summa che las vischnancas han da bun e las autras han da pajar, munta a 13,9 milliuns francs. Quels paja il chantun.
48 vischnancas profiteschan da gulivaziun da muntogna e da scola
Cun la gulivaziun da las grevezzas geografic- topograficas e da scola survegnan vischnancas che han in dischavantatg pervi da quellas ina gulivaziun. L'onn proxim è quai il cas tar 48 vischnancas che survegnan total 25 milliuns francs. Questa summa metta il chantun a disposiziun. La gronda part da quella summa vegn investida en vischnancas en Surselva ed il Partenz/Tavau.
17 vischnancas han da bun agid pervi da l'agid social
Vischnancas ch'èn pertutgada surproporziunalmain da l'agid social, pon s'annunziar per survegnir ina gulivaziun. Questa gulivaziun mesiran ins vi da las expensas nettas da las vischnancas en relaziun cun il potenzial da resursas. La summa da gulivaziun vegn resguardada mintgamai per l'onn che vegn.
Suenter che las dumondas dal 2021 èn vegnidas resguardadas, vegnan pajadas prestaziuns da total 2,4 milliuns francs a 17 vischnancas. 1,9 milliuns survegn sulet la citad da Cuira. Tar quatter vischnancas vegn examinà pli da rudent la dumonda – qua sa tracti d'ina controlla sporadica.
Il Cussegl grond vegn a fixar las valurs directivas per la gulivaziun da finanzas 2023 ensemen cun il preventiv dal 2023.
