Il chantun Grischun duai survegnir l'auter onn radund 8,8 milliuns francs pli pauc or da la gulivaziun da finanzas che l'onn 2024. Concret duai dar per il Grischun 226 milliuns francs. Quai resulta da las calculaziuns actualas che l'Administraziun federala da finanzas ha fatg. Las cifras pon entant anc sa midar.
Il minister da finanzas grischun Martin Bühler ha ditg sin dumonda da RTR, che quaj saja bain daners che manchian en il futur. Da tschella saja il Grischun vegnì pli ferm finanzialmain e quai saja bun.
Ussa stuain nus però lavurar vinavant cun cuntinuitad e ruas, lura pudain era realisar quai ch'è planisà en temps pli turbulents.
Cunquai ch'il Grischun è vegnì pli ferm finanzialmain, quinta il chantun entant ch'ils pajaments or da la gulivaziun da finanzas vegnan a sa sminuir era ils proxims onns.
Tut en tut vegnan l'onn 2025 6,2 milliardas francs pajadas en la gulivaziun da finanzas. Cumpareglià cun l'onn 2024 correspunda quai ad in plus da bunamain 5%. Da questas 6,2 milliardas francs paja la Confederaziun 4,2 milliardas.
Zug paja il pli bler
Da pajar il pli bler en la cassa da la gulivaziun da finanzas ha l'onn che vegn il chantun Zug, cun radund 431 milliuns francs. Zug surpassa cunquai il chantun Turitg ch'era fin ussa il chantun ch'aveva pajà il pli bler. L'onn 2025 paja il chantun Turitg 419 milliuns francs en la gulivaziun da finanzas. Quai èn 43 milliuns pli pauc che l'onn 2024.
Berna survegn il pli bler
Il chantun che survegn ils pli blers daners or da la cassa da la gulivaziun da finanzas è il chantun Berna. El survegn 132 milliuns francs dapli che l'onn actual, concret 1,433 milliardas francs. Da nov sto era il chantun Schaffusa pajar en en la cassa da la gulivaziun da finanzas. Fin ussa ha Schaffusa pudì profitar dals daners.
Las cifras che l'Administraziun federala da finanzas ha preschentà n'èn anc betg definitivas. Il rapport vegn ussa preschentà als chantuns per prender posiziun en chaussa. Suenter vegn il Cussegl federal ad adattar l'ordinaziun davart la gulivaziun da finanzas e metter en vigur quella sin il prim da schaner 2025.
