Siglir tar il cuntegn

Header

cuntegn

Gulivaziun da finanzas 2023 Grischun survegn 269 milliuns francs

Il Cussegl federal ha approvà il pajament per ils chantuns per l'onn 2023. Il Grischun profitescha e survegn 1'308 francs per persuna.

L'entira gulivaziun da finanzas per il 2023 è radund 5,6 milliardas francs. Da quai survegn il chantun Grischun 269 milliuns, sco il Departament federal da finanzas scriva. La gulivaziun duai reparter ils gudogns da chantuns bainstants pli guliv sin tut ils chantuns. Il Grischun sco chantun rural profitescha, cun quai ch'el na profitescha betg d'ina industria u ina branscha da finanzas ferma.

Sco chantun cun bleras resursas paja Basilea citad 118 milliuns francs en il rom da la gulivaziun da finanzas.
Legenda: Sco chantun cun bleras resursas paja Basilea citad 118 milliuns francs en il rom da la gulivaziun da finanzas. Keystone

Daners per chantuns cun paucas resursas

Per persuna survegn la populaziun dal Vallais il pli bler dals pajaments, radund 2'400 francs. Cuntrari paja il Chantun Zug il pli bler per persuna: bunamain 2'900 francs. En cifras absolutas contribuescha il chantun Turitg cun ina mesa milliarda francs ils pli bler daners. Ed il chantun Berna profitescha il pli fitg e survegn radund 1,1 milliardas francs.

Cumpareglià cun l'onn current èn las contribuziuns totalas creschidas per 290 milliuns francs. Quai tranter auter perquai ch'il potenzial da resursas dals chantuns cun bleras resursas crescha pli svelt ch'il potenzial da chantuns cun pli paucas resursas.

audio
Per tadlar: las novitads da las 14:00
ord RTR Audio dals 16.11.2022.
laschar ir. Durada: 3 minutas 12 Secundas.

RTR novitads 14:00

Artitgels legids il pli savens

Scrollar a sanestra Scrollar a dretga