Ma davos las culissas marschan las lavurs da preparaziun. Il mument mancan anc duas chaussas per ch’il chantun possia definitivamain dar glisch verda per la construcziun, declera il manader da la Calandawind SA, Jürg Michel che vuless bajegiar l'ulteriura roda da vent.
L'ina saja in rapport pertutgant il piv (Uhu). Ins saja vidlonder cun in biro d'ambient ed in spezialist da pivs. Quels guardan ussa anc ina giada exactamain la chaussa. Ins haja er gia gì discurs cun la secziun grischuna da Birdlife ed haja chattà là pli u main ina schliaziun, cun mesiras per restrenscher fermamain il risico da mortoris tar il utschels. Mesiras sco automatissems per che la roda da vent sa tschenta giu sch'il piv è en vischinanza enfin tar la sanaziun da legias da la Viafier Retica.
Jürg Michel accentuescha che ad el e surtut a ses anteriur partenari da fatschenta, Josias Gasser ch’è mort l’october 2025 saja adina stà impurtant da far tut il necessari per sa cunvegnir cun las organisaziuns per la protecziun da l’ambient.
Pon ins anc cuntanscher a temp la midada energetica?
«Perquai na precipitain nus ussa nagut, mabain vulain propi far ulteriuras examinaziuns, per ch'era Birdlife saja persvadì», di Jürg Michel.
Eruir la meglira varianta
Sper las examinaziuns en connex cun il piv, èn vegnidas fatgas durant in onn mesiraziuns da vent en connex cun las offertas per la roda da vent sco tala. Quellas haja ins ussa tramess a las duas producentas da rodas da vent che vegnan en dumonda. Radund otg emnas dovrian quellas per decider, tge installaziuns che vegnian en dumonda per Haldenstein. Ed il mument hajan ellas fitg bler da far. La pli gronda producenta haja ditg, che tar els giajan or dus parcs da rodas a vent per emna. Perquai dovria ins pazienza.
Jürg Michel va ora da quai ch’ins possia la stad da quest onn inoltrar la dumonda da bajegiar tar il chantun. E sch'i va tut sco ch’i duess, èsi previs d'entschaiver a bajegiar la roda da vent en il decurs dal 2028.