Impressiuns dal di d'avertura - Finalmain puspè avert suenter il lockdown

Dapi ils 16 da mars èn bleras fatschentas serradas. Uss suenter passa in mais pon ils emprims manaschis puspè avrir. Beneventar clientella e quai cun tegnair en tut las mesiras da distanza ed igiena è dentant ina sfida.

Blera glieud a Schluein

Durant il temp da corona fan blers urden enturn ed en chasa – e vegnan creativs. Perquai è la Landi a Schluein in lieu popular. Là è gia blera glieud vegnida gia la bun'ura per far las cumpras per curtin, iert e perchasa. Il percadi è stà emplenì bain.

Betg mo a Schluein, er en auters lieus stat la glieud en colonna:

Anc ruassaivel a Susch

Temp da primavaira e temp da corona è il mument perfetg per far iert. La giardinaria da Elisa Bonorand-Müller a Susch ha er pudì avrir sias portas. Tenor ella gist in bun mument, cura ch'ins po cumenzar a far iert e curtin en l'Engiadina. La bun'ura n'hai dentant anc dà naginas colonnas en l'orticulura a Susch.

Quasi sco adina

Er Patric Müller po puspè avrir sia butia da flurs a Cuira. Sco el di n'hajan els betg da lavurar bler auter. I dettia in vaider tar la cassa e la clientella saja supplitgada da pajar cun carta. En la stizun n'èsi dentant betg stà in grond chatsch glindesdi avantmezdi cura che las portas èn puspè stadas avertas.

Avert – ma po betg vender tut

Er la stizun Zinsli che venda products da ferramenta e perchasa a Glion ha puspè pudì arvrir. Dentant n'è la vendita betg uschia sco usitada. La part da la stizun che venda rauba da tegnair chasa sto restar serrada. Co quai funcziuna:

Tagliar chavels cun guants e mascra

Finalmain puspè laschar tagliar chavels. Tgi che n'ha betg fatg l'experiment da tagliar sez a chasa ils chavels – u quels che n'han forsa betg ch'è gartegià han gia fatg lur termins tar ils coiffeurs. Betg da smirvegliar ch'i dat bler da far per ils coiffeurs suenter il lockdown. Tegnair en las mesiras da corona n'è dentant betg uschè simpel, quai mussa l'exempel da la coiffeusa Barbara Schwager a Cuira. Ella po be beneventar trais clienta a la giada ed ha in'agenda da termins pulit plaina.

Parcadi plain a Glion

Sper la Landi ha er il Coop Bau + Hobby da Glion puspè avert. Il temp da corona fa vegnir creativ. Ed in u l'auter entschaiva a zambregiar. Il parcadi è bain plain, ma colonnas n'haja anc nagina davant stizun.

La glieud s'allegra

Regula Giger ha er gì grond plaschair da puspè pudì beneventar la clientella en sia orticultura a Mustér. La bun'ura hajan els era gì blera glieud che saja vegnida. Cumpradas vegnian plantinas e flurs per far bel il curtin.