Ils emprims dis da chatscha han ils chatschaders e las chatschadras grischunas quest onn sajettà 12 % dapli chavriels che l’onn passà. Tenor l’emprima bilantscha èn però vegnids sajettads 6% pli paucs chamutschs e circa medem blers tschiervs. Quai di Hannes Jenny da l’Uffizi da chatscha e pestga sin dumonda dad RTR. Las cundiziuns sajan dentant stadas meglras en il nord ch'en il sid dal chantun. Gist l'emprim di da chatscha ch'è fitg impurtant hai dà ferma plievgia en il sid dal chantun. Suenter il barat cun ils differents guardiaselvaschina po Hannes Jenny tuttina dir che l'entschatta da la chatscha saja gartegiada. Fin ussa saja ina buna e calma chatscha. Cun excepziun da l'accident en il Puschlav er senza pli gronds accidents.
L'atmosfera tranter ils chatschaders e las chatschadras para dad esser fitg buna.
Il luf porta avantatgs e dischavantatgs
Natiralmain haja er il luf in'influenza sin la chatscha. Intgins territoris profiteschan schizunt dal luf. Perquai ch'il luf va a chatscha là nua ch'igl ha blera selvaschina van ils lufs er en ils asils da selvaschina e chatschan alura per part ils animals en il territri da chatscha. Uschia han ins per exempel en il Grischun Central gì ina fitg buna repartiziun dal animals avant l'emprim di da chatscha e quai grazia al luf. Da tschella vart è natiralmain cun il luf in ulteriur «chatschader» en acziun. Quai fetschia la situaziun pli difficila per la selvaschina ed il dumber sa sminueschia per part. Uschia han ins per exempel en la regiun sura da la Surselva stuì adattar il plan da reducziun. Cun il luf vegna la chatscha pli pretensiusa per tuts.
