Suenter onns da planisaziun e construcziun è l’areal da sport sin l'Obere Au finalmain vegnì avert uffizialmain cun pleds festivs ed in gieu uffizial da Cuira 97.
Quai è in grond di per la citad da Cuira. Igl è impurtant che nus possian porscher bunas infrastructuras da sport.
Fin ch'ins ha finalmain pudì dar per l'emprima giada in gieu en il nov stadion, hai dentant cuzzà in pulit temp. L'onn 2018 ha il pievel votà davart quest project «Eisball». Il project è lura vegnì realisà pass per pass ed ussa terminà. Uschia èn vegnids construids ina halla da glatsch, in stadion cun ina plazza da tschispet, quatter ulteriuras plazzas da tschispet e trais plazzas da pastg artifizial. Tenor la citad da Cuira è quest implant il pli grond implant da sport dal Grischun ed in dals impurtants da la Svizra orientala.
Impressiuns dal stadion
-
Bild 1 von 9. Surdada da las clavs. Bildquelle: RTR.
-
Bild 2 von 9. L'avertura da l'areal da sport. Bildquelle: RTR.
-
Bild 3 von 9. L'emprim gieu: Cuira 97 cunter la segunda equipa da Schaffhausen. Bildquelle: RTR.
-
Bild 4 von 9. Bildquelle: RTR.
-
Bild 5 von 9. Bildquelle: RTR.
-
Bild 6 von 9. La tribuna sin la plazza principala da l'areal da sport. Bildquelle: RTR.
-
Bild 7 von 9. Bildquelle: RTR.
-
Bild 8 von 9. Bildquelle: RTR.
-
Bild 9 von 9. Bildquelle: RTR.
Ils fans da sport ed ils clubs èn da la medema opiniun: Malgrà il lung temp da spetga sajan ins cuntent ch'ins possia finalmain duvrar l'areal. Tschintg onns han ils clubs stuì giugar en in provisori, perquai ch'il stadion vegl sper la Ringstrasse vegn transfurmà en ina scola.
Quest stadion è tenor mia valitaziun vegnì construì per ina liga pli auta. Quai è a lunga vista precis nossa finamira.
Malgrà la bun'atmosfera ed in nov stadion n'hai dà nagins gols en il gieu d'avertura. Cuira 97 e la segund'equipa da Schaffhausen han finì la partida cun in pari da 0:0 suenter las 90 minutas.
Christoph Sünderhauf, il president dals Calanda Broncos – l'equipa d'american football da Cuira – è fitg cuntent cun il resultat. Finalmain possian ins giugar sin ina plazza che correspundia a las dimensiuns originalas d'american football.