Siglir tar il cuntegn

Header

video
Ils arguments per e cunter l'iniziativa dal clima da citad a Cuira
Or da Telesguard dals 20.02.2024.
laschar ir. Durada: 4 minutas 3 Secundas.
cuntegn

Iniziativa dal clima da citad 1 iniziativa – 3 posiziuns

Ils 3 da mars decida Cuira en chaussa iniziativa dal clima da citad e sia cuntraproposta – qua las trais posiziuns.

Chaliras durant la stad n'è nagut extraordinari pli a Cuira. Il 2023 ha il termometer bunamain cuntanschì 38 grads. Perquai pretenda l'iniziativa dal clima da citad mesiras concretas – e quai tant pli spert. Quai a maun da dus aspects:

  • dapli surfatschas verdas
  • dapli vias segiras per peduns e velos

Durant ils proxims 10 onns duajan mintg'onn vegnir transfurmadas 1% da las vias en surfatschas verdas, en vias segiras per peduns e velos u en zonas da scuntrada. Ina gronda part da quai possian ins gist colliar cun il project da la IBC, che schlargia sia rait termala e chaschuna atras quai uschè u uschia plazzals sin las vias da Cuira.

Tenor ils quints dal cussegl da la citad da Cuira muntan ils custs da questa iniziativa a 35 milliuns francs per ils 10 onns. Ils iniziants ed iniziantas crititgeschan quest quint e pretendan che las mesiras ch'els prevesan, vegnissan bler pli favuraivlas.

audio
Pro e contra per l'iniziativa dal clima da la citad
ord Actualitad dals 21.02.2024. Maletg: RTR
laschar ir. Durada: 3 minutas 45 Secundas.

Tuttina ha il parlament refusà l'iniziativa – trametta dentant la cuntraproposta dal cussegl da la citad en la cursa. En quella na sajan nagins perimeters definids – persuenter l'intenziun d'examinar en futur mintga project da via e d'adattar quel uschè bain sco pussaivel als basegns dal clima. La cuntraproposta chaschunass uschia sur 10 onns custs da radund 10 milliuns francs.

Ils custs – tant da l'iniziativa – sco era da la cuntraproposta – èn per ils adversaris memia auts. Tenor il comité «2 x Na» saja la citad da Cuira gia oz sin buna via e perquai na saja quai betg necessari d'investir anc dapli raps en tals projects – surtut cunquai che Cuira haja avunda grondas investiziuns che ston vegnir pajadas en ils proxims onns.

RTR Telesguard 17:40

Artitgels legids il pli savens