Il center d’innovaziun a Cuira, InnoQube Swiss SA, serra sias portas. Sco l'interpresa ha confermà envers RTR saja il motiv che start-ups ed interpresas investeschian pli pauc en l’innovaziun, pervia da la malsegirezza economica. Uschia na saja il servetsch betg pli stà supportabel finanzialmain. InnoQube – innovaziun en in cubus – aveva avert sias portas il 2024.
Al cumenzament dal project d'innvoaziun al Rossboden a Cuira discurriv'ins d'in Sillicon Valley 2.0 e da circa 250 plazzas da lavur. Locatura da l'edifizi è la ITW Group dal Principadi dal Liechtenstein, lezza deplorescha la situaziun che l'InnoQube serra las portas. Els sajan en sasez vid tschertgar affitaders e veglian betg perder quels, ha ditg Daniel Egger, il manader d'immobigliar da la ITW Group. Er la citad da Cuira spera ch'ins vegnia puspè a pudair occupar la surfatscha libra.
Jau sper ch'i dat puspè dapli vita en l'edifizi sin il Rossboden. Forsa è quai er ina schanza ch'autras firmas e start-ups chattar la via a Cuira.
La citad da Cuira è mai stada involvada finanzialmain en il project ch'era vegnì lantscha il 2018. Da lez temp era la citad stada fitg intgantada da l'idea.
Gronda surfatscha vegn libra
Avant in onn e mez cura che las portas dal nov center d'innovaziun èn avertas aveva la InnoQube prendì a tschains ina surfatscha da 1'200 meters quadrat. En il decurs dal temp ha l'InnoQube dentant reducì la survetscha sin 585 meters quadrat quai che correspunda bun duas plazzas da tennir. E questa surfatscha vegn uss libra.
Gia senza la surfatscha che vegn libra dad InnoQube eri bun la mesadad dal spazi anc liber en l'edifizi d'innovaziun che porta il num «liug». La situaziun saja tut auter che simpla, uschia Daniel Egger. El di ch'i dettia er anc en il center da Cuira spazi liber, uschia che firmas possian encurrir ora. La ITW Group giaja però tuttina vinavant a la tschertga dad affitaders che han interess da laschar crescher il spazi innovativ a l'ur da la citad da Cuira.
