La Banca Chantunala Grischuna ha instradà in’examinaziun externa en connex cun il cas da l’investider austriac René Benko e ses concern d’immobiglias Signa ch’è collabà. En il focus stettia la dumonda sche la banca haja concedì credits problematics ed er sch'il president dal cussegl da banca Peter Fanconi è stà involvà. Quai ha ditg il directur da finanzas Martin Bühler ad ina conferenza da medias.
Peter Fanconi haja glindesdi passà infurmà la regenza davart il cas e davart l'examinaziun.
Suenter quella infurmaziun èsi cler: Per la regenza na datti actualmain nagin motiv da disfidar a Peter Fanconi.
Ins vegnia a spetgar sin ils resultats da l'examinaziun independenta. Quella duessia surtut augmentar la transparenza, uschia Bühler vinavant.
Dasper la banca privata Julius Bär han er pliras bancas chantunalas concedì credits da milliuns a Benko. Tenor ina glista da crediturs – ch’è cumparida il schaner – ha la Banca Chantunala Grischuna concedì in credit da passa 60 milliuns francs. Quai n’ha la banca fin uss betg confermà.
Renfatschas cunter Fanconi – el sez dementescha vehementamain
Sco la «Sonntagszeitung» ha purtà a la glisch, haja dà contact dad email tranter Peter Fanconi, il president dal cussegl da la Banca Chantunala Grischuna e René Benko, l'investider austriac. Perquai saja uss er impurtant da laschar far l'inquisiziun da vart externa, uschia Martin Bühler. Quai tranter auter perquai che Peter Fanconi fiss en sia posiziun bain quel ch'avess da survegliar la banca, na possia uss dentant betg far quai cunquai ch'el saja para involvà tras il contact dad email cun Benko.
Las renfatschas cunter il president dal cussegl da banca èn tranter auter:
- Peter Fanconi duai avair «avert las portas» per credits tar autras bancas chantunalas grazia a sia rait da contacts.
- A la banca chantunala smanatschan uss perditas da milliuns pervi dal credit a l'imperi d'immobiglias ch'è uss collabà.
- René Benko duai avair organisà trais dis vacanzas al lai da Garda per Peter Fanconi.
- Ch'igl era ina relativamain stretga relaziun tranter l'investur ed il president dal cussegl da banca.
En ina lunga intervista cun la gasetta Südostschweiz refusescha Peter Fanconi tut questas renfatschas. En chaussa «avrir portas» tar autras bancas chantunalas di Fanconi ch'el haja sulettamain dà vinavant la dumonda per in credit ad ina autra banca ch'era medemamain interessada ed infurmà René Benko davart quai ch'el haja dà vinavant la dumonda. Plinavant saja quai usità ch'i dettia per investiziuns da talas dimensiuns consorzis da credit nua che pliras bancas lavurian ensemen. Perquai che ina suletta na possia per il pli gnanc finanziar quai – uschia dettia er il barat. Quai na saja nagin servetsch per René Benko. En quest connex conferma Peter Fanconi er per la prima giada uffizialmain che la Banca Chantunala Grischuna è part da quest consorzi da credit per la finanziaziun dal bajetg dal Globus a Turitg. La raschun che er la GKB conferma uss il credit è che tut è entant vegnì public e discutà lung e lartg. Uschia sajan ins sa decidì da sa laschar deliberar dal secret da bancas ed er communitgar transparent sco er gia autras bancas.
En connex cun il credit da var 60 milliuns francs punctuescha Peter Fanconi plinavant ch'i na constettia betg che la banca haja uss da scriver giu grondas summas. Il credit saja segirà fitg bain cun il bajetg a Turitg - independentamain sche la gruppa da l'investur austriac saja cunpossessura u betg. Ed els concedissan pli segir ozendi anc ina giada quest credit.
Puncto l'offerta per ils dis a lai da Garda conferma Fanconi che l'investur austriac haja offerì quai. En l'intervista cun la gasetta prelegia el però er ina part d'in e-mail che la Sonntagszeitun n'ha betg publitgà: En quella renviescha Peter Fanconi cleramain l'offerta d'organisar ils dis da vacanzas sco er ina «tgira speziala» per el e sia dunna. Fanconi respunda là a Benko ch'els veglian gugent vegnir tenor pussaivladad intgins dis en l'hotel, ma el vegnia sez a contactar l'hotel ed er a pajar tut sco osp.
Che Peter Fanconi e René Benko han communitgà colleghialmain in cun l'auter na snega il president dal cussegl da banca betg. Quai saja però usità. El dettia a tuttas e tuts il Ti e Benko saja cun ses «Schmäh da Vienna» uschè u uschia amicabel cun tuts. Sco president dal cussegl da banca saja ses pensum da tgirar contacts e far networking ed el survegnia mintga di var 100 e-mails sumegliants en lingua colleghiala. Sia relaziun cun l'investur austriac descriva Peter Fanconi sco colleghial e «contact luc en rom da fatschenta». Els sajan sa vesids quatter fin tschintg giadas ed hajan gì contact l'ultima giada avant bun in onn.
Fatg in u l'auter sbagl
Sin la dumonda sch'el haja fatg sbagls cun in cler Na quai che pertutga la dumonda da conceder credits. En l'hotel a Garda na giess el però betg pli. Ed el na dess er betg pli in'intervista communabla cun in investur per ina gasetta da Gourmet sco el haja fatg avant quatter onns cun René Benko. Cun quai vegnia el anc oz confruntà. Quai sugereschia er dad esser da manaivel ad ina persuna er sch'i na dettia nagina relaziun stretga. Quell'intervista saja stà in sbagl.
A l'image da la GKB haja l'entira chaussa bain fatg donn perquai ch'ils rapports da medias dettian l'impressiun ch'insatge giaja fallà tar la banca. Qua sa dostia el decididamain encunter. Professiunalmain vegnia el bain a frida cun la situaziun e n'haja er betg fatg patratgs da sa retrair. Auter saja privat. Quai occupia er ses conturn. Ed el fa quitads che talas rapportaziuns falladas fetschian che anc pli pauca glieud haja insumma interess da surpigliar tals posts exponids.
Partidas politicas pretendan transparenza
La Partida populara dal Grischun pretenda en in scriver che l'entira chaussa stoppia vegnir sclerida cumplettamain. Sper quai spetgian ins er dal minister da finanzas ch'el prendia sut la marella la situaziun cun in egl critic. Sco Walter Grass, il president da la fracziun da la PPS en il Cussegl grond, ha ditg envers il Schurnal regiunal da SRF, sajan ins er vi da ponderar da far intervenziuns parlamentaras e sch'i vegnia or che relaziuns persunalas hajan giugà cun, lura na sclaudia la PPS betg che Peter Fanconi stoppia sa retrair.
L'Allianza dal Center sco er la Partida socialdemocrata beneventan l'inquisiziun externa, uschia Kevin Brunold, president da l'AdC e Lukas Horrer, vicepresident da la PS. I dovria uss communicaziun transparenta, er per evitar in donn dad image. L'AdC giavischa sper quai er che la cumissiun da gestiun dal Cussegl grond prenda sut la marella il cas. La Partida liberaldemocratica n'è anc betg sa fatschentada cun il cas.
