Satellits giogan ina rolla adina pli impurtanta en la surveglianza da privels da natira. In project da l’Institut da naiv e lavinas a Tavau mussa co tecnologias modernas sco satellits ed intelligenza artifiziala (IA) vegnan cumbinadas per furnir datas pli precisas. Tuttina datti anc sfidas considerablas.
Satellits sco clav tecnologica
Satellits pon survigilar vastas surfatschas en curt temp ed era rimnar datas malgrà nivels u tschajera – in avantatg che auters sistems na pon betg porscher. Tuttina han ils satellits era cunfins: els sgolan adina sin trajects fixs e na pon betg survegliar tut ils lieus, spezialmain en territoris cun spundas stippas e cun bleras sumbrivas. Per cuvrir questas zonas zuppadas lavura Yves Bühler cun ses team vi da novas soluziuns, per exempel cun dronas u sistems basads sin terra.
Satellits pon survegliar grondas surfatscha e pon uschia registrar grondas surfatschas en curt temp. In auter grond avantatg dals satellits da radar è ch'els pon rimnar datas atras nivels e tschajera.
In ulteriur focus dal project è l’utilisaziun d’intelligenza artifiziala che vegn per exempel duvrà per cartar lavinas. E malgrà che l'intelligenza artifiziala sa sviluppa extrem spert, resta la prognosa da privels da natira ina gronda sfida. Il motiv principal: I dat paucas datas exactas, perquai che quests eveniments èn rars e difficils da registrar.
Cumbinaziun da tecnologias modernas
Yves Bühler è persvas che la cumbinaziun da differentas tecnologias da surveglianza è la via da success. Cun unir las fermezzas da satellits, dronas ed IA, pon ins optimar la prevenziun da privels da natira e minimar ils ristgs. Malgrà tut ils progress resta dentant cler: ina segirezza totala n'è betg pussaivla.
