Siglir tar il cuntegn

Header

cuntegn

Integraziun 2024-2027 Populaziun duai rimnar ideas cun il chantun

Per elavurar ses program chantunal d'integraziun «PCI 3» per ils onns 2024 fin 2027 vul il chantun Grischun integrar la populaziun, scriva la regenza en ina communicaziun. Il post spezialisà envida a cooperar tar l'elavuraziun da las basas per la politica chantunala d'integraziun da l'avegnir.

Il Cussegl federal ha deliberà il credit d'impegn «Promoziun da l'integraziun 2024–2027». Ussa èn dumandads ils chantuns. Fin ils 30 d'avrigl 2023 han els temp da fixar lur programs chantunals d'integraziun. Cun quests programs mussan els, co ch'els vulan cuntanscher las finamiras da la politica d'integraziun definidas da la Confederaziun e dals chantuns.

Grondas sfidas spetgan

Las cifras d'asil han per l'emprima giada puspè cuntanschì il nivel dals onns 2015/2016. E quest resultat na resguarda betg anc las var 70'000 persunas da l'Ucraina ch'èn fugidas en Svizra. Era l'ulteriura immigraziun per motivs sco lavur, famiglia e scolaziun è sin in fitg aut nivel.

Gist per il sectur da l'asil e da la migraziun è il temp actual fitg pretensius.
Autur: Peter Peyer Cusseglier guvernativ

Tant pli gronda impurtanza vegn il tema integraziun e convivenza ad obtegnair ils proxims onns. I vegnan a sa mussar sfidas da l'entira societad che surpassan per bler las pussaivladads d'agir da las autoritads. Per che las fugitivas ed ils fugitivs sco er las persunas immigradas chattian uschè svelt sco pussaivel lur plaz en la cuminanza è il chantun Grischun sa decidì per in vast process participativ sut la devisa «Concepir ensemen». Il Post spezialisà per l'integraziun vegn ad elavurar in program d'integraziun progressiv ed innovativ en il barat cun la societad civila, cun las uniuns da migrantas e migrants, cun las organisaziuns dal mund da lavur, cun las vischnancas, cun ils posts da servetsch cumpetents e cun tut ils ulteriurs circuls interessads.

Workshops l'auter onn

Il schaner e favrer 2023 vegnan lura organisads plirs workshops tematics che sa basan sin propostas inoltradas da persunas interessadas. Là vegnan las acturas ed ils acturs interessads ad empruvar d'elavurar ensemen ils tratgs fundamentals. Il resultat final vegn lura preschentà a la Regenza grischuna, la quala sto deliberar il «PCI 3» per mauns da la Confederaziun.

audio
Per tadlar: las novitads da las 12:00
ord RTR Audio dals 21.11.2022.
laschar ir. Durada: 10 minutas 2 Secundas.

RTR novitads 09:00

Artitgels legids il pli savens