Ils uffants vegnan instruids tenor il plan d’instrucziun 21, pia sco auters scolars en il Grischun. La finamira saja dentant er l’integraziun, di Edvin Demund da l'Uffizi da migraziun e da dretg civil dal Grischun. Ils scolars e las scolaras midian lura en la scola da la citad sch’els sappian bain avunda tudestg.
Chattà magistras e localitads
Da drizzar en uschè svelt ina scola è stà ina sfida per il chantun – tant en vista a la mancanza da magistras sco era puncto localitads. La finala hajan ins chattà avunda magistras diplomadas, di Edvin Demund. I fiss er stà ideal d’avair in lieu nua che tuts uffants avessan pudì ir ensemen a scola. Ma da chattar in bajetg cun avunda localitads per stanzas da scola n'è betg stà pussaivel.
Uschia van ils uffants da scoletta e da las emprimas trais classas uss a scola en la Tittwiesenstrasse. Per ils uffants pli vegls datti stanzas da scola a Rothenbrunnen, Trimmis ed a la scola chantunala.
L’emprim di ch’ils fugitivs arrivan dumondan els suenter la scola per ils uffants.
Per ils geniturs ucranais è la scola insatge fitg impurtant. Betg mo pervia da la furmaziun dals uffants. La scola structurescha era il decurs dal di. Plinavant frequentan blers uffants en pli anc online ina scola ucranaisa.
Chapeschan adina meglier tudestg
Instruì vegn per tudestg. L’entschatta da l’onn da scola saja quai stà grev, di Sabrina Böniger ch'instruescha otg uffants da l’emprima classa. Ella è magari sa gidada cun il translatur da google. En il fratemp – suenter be trais mais – chapeschan ils uffants gia pulit bain tudestg, cunzunt las frasas ch’ins dovra adina puspè. Las experientschas fin uss? Ella ha plaschair ch’ils uffants participeschan uschè bain a l’instrucziun.
Uschiglio èsi sco cun auters uffants – els han mirveglias d’emprender.
E senta ins ch'ils uffants èn fugids da la guerra?
Mintgatant sentia ins frustraziun, per exempel sch'i giaja tgunsch en paglia material. Quai stoppian ins acceptar, ils uffants fetschian tras bler. In dals scolars haja er raquintà nua che ses bab stoppia ir en il cumbat. Uschiglio raschunian ils uffants dentant dapli da lur vita actuala che da la guerra, per exempel nua ch’els vivian uss e tge hobis ch’els hajan.
