En il Grischun datti memia paucas plazzas per Jenics e Sinti, sco quai ch'in rapport da la fundaziun «Zukunft für Scheizer Fahrende» mussa. En tut mancan 30 plazzas da transit e duas plazzas da dimora, spezialmain en la Val dal Rain, da Maiavilla fin Tusaun, sco er en il Partenz sut.
Il chantun Grischun saja gia vi da stgaffir dapli plazzas per Jenics e Sinti, ed el saja sin buna via, ha declerà il cusseglier guvernativ Martin Bühler.
En il Grischun è gia vegnì fatg bler, e nus essan cuntinuadamain londervi cun las vischnancas da stgaffir questas infrastructuras che mancan anc.
La tschertga da novas plazzas na giaja dentant betg senza las vischnancas – ellas decidan, tge e nua ch'i vegn construì. «Nus vegnin a tschertgar pussaivladads e far questas dumondas», di il cusseglier guvernativ Martin Bühler. «Sco che nus essan ussa organisads, na pudain nus dentant betg sfurzar las vischnancas – e quai na fiss era betg bun.»
Per quest motiv na sappia el era betg dir exact, cura e nua ch'ins stgaffeschia novas plazzas. El suttastritga dentant, ch'il chantun s'engaschia er activamain per las plazzas da staziunament existentas a Panaduz, Cazas, Cuira, Domat e Ziràn.
In'ulteriura sfida per stgaffir dapli plazzas sajan pregiudizis envers ils Jenics ed ils Sinti. Las possessuras ed ils possessurs da bains immobigliars – nua ch'i pudess dar novs plazs – ston vegnir persvas, ch'in tal plaz saja era raschunaivel.
La finala è la responsabladad tar tuts da la populaziun.
Il chantun Grischun lavuria cunter quests pregiudizis, per exempel cun podiums, declera Martin Bühler. Tuttina saja quai la fin finala la responsabladad da tut la populaziun.
Il Grischun ha ina responsabladad istorica envers la cuminanza dals Jenics e Sinti. Tranter 1926 e 1972 èn vegnids separads en il rom da l'organisaziun d'agid «Kinder der Landstrasse» stgars 600 uffants da lur famiglias e plazzads en chasas d'uffants u en famiglias da tgira. La mesadad da quests uffants derivavan dal Grischun.