Sa tschentada tar la Spitex è Jolanda Pratico da Pazen en Val Schons avant passa dus decennis or da raschuns pragmaticas: ella haja gì da gudagnar raps. Senza diplom u experientscha ha ella survegnì la schanza da lavurar per la Spitex. Suenter l'emprim discurs haja ella accumpagnà ina collavuratura e suenter saja ella ida suletta tar clients e clientas. Emprendì haja ella sezza e surtut ensemen cun las persunas ch'ella haja gì da tgirar. Pli tard haja ella fatg in curs tar la Crusch Cotschna per emprender a gidar tar la tgira dal corp e far il dachasa.
Il pli impurtant è restà tuttina sur tut quels onns: la stima e l'engraziaivladad da clientella e dals confamigliars; e quai è il pli impurtant.
Constantas e midadas
Sias incumbensas principalas sajan sur ils 26 e mez onns ch'ella haja lavurà tar la Spitex restadas las medemas. Sa midà fermamain haja dentant il dumber da clients e clientas, i saja adina daventà dapli persunas che dovrian l'agid da la Spitex. Las pli grondas midadas haja dà en in sistem d'administraziun, cun quai haja ella magari gì sias fadias. Il pli essenzial saja dentant sur tut quels onns restà medem: la stima e l'engraziament da clients e clientas e confamigliars per l'agid en il mintgadi – e quai saja il pli impurtant.
Ils pli bels muments eran quels, cura ch'ils clients m'han ditg grazia.
Muments che restan
I dettia blers muments ch'ella vegnia a tegnair en memoria da sia vita professiunala tar la Spitex. Saja quai il client che haja ditg cura ch'i gieva per far la duscha che l'aua saja bletscha, ubain ch'ella haja stuì refusar ad intginas dumondas da maridar. I saja adina stà impurtant ad ella da tegnair ina tscherta distanza. Tar ses clients e clientas saja ella adina sa sentida bainvegnida ed er in zic da chasa.
Sper l'agid en il mintgadi è il contact social cun las clientas ed ils clients adina stà fitg impurtant.
Da tutt'aura è ella stada da viadi en Val Schons, Valragn ed Avras, ina giada haja ella perfin stuì far or la naiv sin ina via or da la Val d'Avras suenter ina bova fin ch'il lavurer da vischnanca saja vegnì per deliberar la via da la naiv. Sch'ella pudess anc ina giada tscherner, lura faschess ella anc ina giada il medem. Dapi la fin d'avust è Jolanda Pratico dentant pensiunada ed ha temp per metter ad aut ils pes e giudair. Per il cas ch'ella vegnia ina giada sezza a duvrar il sustegn da la Spitex haja ella gia instruì ses collegas da la Spitex Viamala.
Tar mai na sto la Spitex alura betg vegnir avant las 10 la bunura.
