RTR: Jon Domenic Parolini, Vus essas dapi 12 onns cusseglier guvernativ, Avais pia fatg trais cumbats electorals. Quest onn n’era quai betg pli il cas. Co era quai per Vus da betg pli far quest cumbat?
Jon Domenic Parolini: Quai è d’ina vart ina bella situaziun ch’jau n’hai betg pli dad ir en il cumbat ed esser confruntà cun tut questas intschertezzas e situaziuns ch’i po dar. Jau hai fatg tras dal tut questas ultimas trais giadas. Ma in cumbat electoral ha era varts positivas. Però jau stoss dir, jau hai ussa vesì quai trais giadas. Ed jau giaud er d'observar e da betg stuair esser plainamain en quest cumbat.
Però Vus eras tuttina datiers a quest ravugl da collegas che han tuttina fatg il cumbat, saja quai da la regenza u era da la partida. Avais Vus mintgatant dà in u l’auter tip a questas persunas?
Jau n’hai betg da dar tips. Ma sch’i dumondan u sche nus avain discutà davart il cumbat electoral, lura hai jau natiralmain era deponì forsa in pau mes patratgs areguard il cumbat sco ch’el sa preschenta. A mai para ch’i vegn mintgatant forsa ì en memia pauc sin las differenzas tranter las candidatas e candidats. Mintgin dovra ses arguments e di cun frasas forsa in pau generalas tge ch’el vul far, ma savens vul l’electur e l’electura era savair las differenzas.
Là avessan ins pudì accentuar quai en quests podiums ch'han gì lieu in pauet pli cler e forsa er crititgar autras candidaturas. Ina giada dumandar: «Ma co giessas enturn cun quel e quel tema? Sche jau observ la tenuta da tia fracziun en ils ultims onns e sche vessas da vegnir elegì en la regenza, alura avessas da prender en in’autra tenuta u che ti vegnissas en in grond conflict cun tia fracziun.» Quai avess bain anc interessà da provocar in pèr candidatas e candidats in zic.
Ils ultims mais durant ch'ils auters han fatg cumbat electoral, avais Vus segir sentì ch'igl è pli calm. È quai gia in preparar per la fin dal temp d’uffizi?
Ma sche Vus dumandassas quai mia dunna, sche schess quella: «Ma jau hai l’impressiun ch’el saja anc adina en la campagna electorala, pertge ch’el ha in termin suenter l'auter e curra da piz a chantun.» E quai è uschia. Ed jau respund lura: «Ussa sun jau sin la turnea da cumià».
Ed il punct culminant ha lieu la dumengia, il di d'elecziun. Co vegniss Vus a passar quest di?
Dumengia bun’ura vom jau plaunet ina giada puspè en direcziun Cuira. Il cumenzament dal suentermezdi, cura che tuts spetgan cun tensiun sin ils resultats, sun jau natiralmain lura era plain tensiun. Jau vegn ad esser qua a Cuira en la chasa da medias e suenter lura er en l’hotel a Cuira, nua che nossa partida ha lura l’inscunter. Là vegn analisà e discutà e gratulà – sperainsa bleras gratulaziuns. Però nus guardain co ch’ils resultats sa preschentan lura.
En quest cas tuttina entamez, ma cun main tremblar, ma poss jau metter avant.
En mintga cas che quai è cun bler main tremblar – ina quietezza. Igl è tut ina autra situaziun. Ma jau sun ina persuna interessada politicamain, e quai vegn a restar tut mia vita.