En la cuschina en tenda sin la plazza da teater a Cuira vegn brassà, frittà e cungì tut a dubel. Las gruppas à mintgamai trais persunas han in'ura temp da striunar in menu sin il taglier che duai persvader la giuria da quatter persunas. Lur pensum è: In menu da pesch cun ina sosa, in supplement e dus differents legums. Duas emnas han las 36 participantas e participants che fan in emprendissadi sco cuschinier ubain cuschiniera en il Grischun gì temp da chattar in recept. Tranter els èn era ils Rumantschs Dario Lorenzo da Puntraschigna e Chiara Putzi e Ramon Bärtschi da Falera.
Far attent a mancanza da persunal
Tar l'occurenza «Kitchenstory» na vai dentant betg per chattar il meglier ubain la megliera junior-cuschinunza, mabain per carmalar dapli persunas giuvnas en la professiun. Toni Curdin Foppa, president dal comité d'organisaziun, di numnadamain ch'adina pli paucas persunas veglian daventar cuschinunz u cuschinunza, perquai che las cundiziuns da lavur, per exempel areguard l'ura da chombra, na sajan betg idealas. Ils ultims onns è l'interess sa sminuì fitg, era pervia da la pandemia. L'onn 2021 è il dumber d'emprendists ed emprendistas prendì giu per 40%. Cun diversas acziuns da promoziun sco ils filmins da la «GastroStory» sin las medias socialas vulan ins cuntanscher ils giuvenils e las giuvenilas.
Nus essan conscients che nus ans stuain era sviluppar vinavant concernent las cundiziuns da lavur.
Il mainagestiun da «GastroGrischun» Marc Tischhauser manegia che las professiuns gastronomicas hajan blers aspects positivs, sco il viagiar e l'esser creativ. Tuttina saja impurtant da pussibilitar novs concepts da lavur sco il «jobsharing». Franz Sepp Caluori, il president da «GastroGrischun» agiunta ch'i dettia bleras pussaivladads da sa scolar per obtegnair posts da lavur cun bunas pajas. La «GastroSvizra» inditgescha nagina paja minimala per persunas minorenas en il contract collectiv da lavur. Per persunas maiorenas prescriva il contract enturn 3'500 francs per collavuraturs e collavuraturas senza emprendissadi. Per persunas cun in emprendissadi AFQ (EFZ) è la paja minimala enturn 4'000 francs.
«Jau vi avrir in agen restaurant»
In part dal problem e da la mancanza da persunal è che 70% fin 80% dals giuvenils e da las giuvenilas midan branscha suenter l'emprendissadi . Dario Lorenzo e Chiara Putzi quintan dentant da restar fidaivels a lur professiun. Dario Lorenzo raquinta ch'el pudess s'imaginar d'esser in di schef da cuschina en in agen restaurant. Ils dis variants e l'ambient da lavur è quai che plascha il meglier a Chiara Putzi.
La gastronomia è dira, ma ha blers bels aspects.
«...3, 2, 1, an die Töpfe los!», dat il moderatur il signal da cumenzar il duel culinaric. Il public observa riend co ch'ils cuschinunzs futurs e las cuschinunzas futuras cumenzan a preparar il menu. Forsa ch'in u l'auter dal publicum vegn era animà da prender quella via professiunala.
