Quest onn vegnan automobilistas ed automobilists confruntads cun damain plazzals sin las vias chantunalas. 128 da quels ha l'Uffizi da construcziun bassa planisà. Quai èn 46 plazzals pli pauc che l'onn passà. Tenor communicaziun da la Chanzlia chantunala saja il dumber en general sa reducì ils ultims onns. La raschun saja, ch'ils projects èn tendenzialmain pli gronds e pli chars, uschia che dapli daners e persunas èn mintgamai liads vid in singul plazzal.
Ils trais projects che stattan quest onn en il focus èn il sviament da La Punt en l'Engiadina, il tunnel Las Ruinas sin la via dal Lucmagn e la finiziun d'ina correcziun sin la via dal Güglia.
L'Uffizi da construcziun bassa fa attent ils utilisaders e las utilisadras da las vias da prender resguard sin ils plazzals, reducir il tempo e prender distanza, uschia che las persunas al lieu pon lavurar en in conturn segir.
Co funcziuna la planisaziun a lunga vista?
Avant che la stagiun da construir cumenza, datti blera lavur da preparaziun per l'Uffizi da construcziun bassa. Mintg'onn vegnia radund in terz da la rait da vias da 1'360 kilometers controllada cun vehichels da mesiraziun. Quests vehichels èn equipads cun cameras e cun sensurs e registreschan il stadi da las vias.
A medem temp vegn il territori mesirà en moda traidimensiunala, uschia ch‘i dat ina reproducziun digitala dal traject en 3D. Uschia pon ils planisaders far pli tard mesiraziuns directamain al computer, senza necessariamain stuair esser al lieu. Suenter examineschan las spezialistas ed ils spezialists da l'Uffizi da construcziun bassa las registraziuns.
Mintga 3 onns resulta uschia in maletg actual dal stadi da mintga singul traject. L'Uffizi da construcziun bassa evaluescha las infurmaziuns rimnadas e cumbinescha quellas cun ulteriurs facturs, sco per exempel il volumen da traffic, il traffic betg motorisà u autras lavurs planisadas. Uschia sa mussi, cura e nua ch‘i dat in basegn d‘agir.
Betg be las vias vegnian evaluadas, mabain era las punts u gallarias. Per regla vegn fatga mintga 5 onns ina inspecziun pli detagliada. Spezialistas e spezialists controlleschan la capacitad da chargia, il stadi e la segirezza.
Or da l'archiv: