95 accidents sin via pli pauc hai dà l'onn 2025 cumpareglià cun il 2024. Co la statistica dal chantun mussa vinavant saja cunzunt legraivel ch'il dumber da persunas mortas entras accidents è ì enavos. Cun 5 persunas è quai il pli bass stan cumpareglià cun ils ultims 10 onns.
Il dumber d'accidents da töf è dentant creschì l'onn 2025 cumpareglià cun l'onn avant. Malgrà l'augment hai dentant dà pli paucas persunas ch'èn sa blessadas grevamain. L'onn passà èn era creschids ils accidents cun velo ed e-bikes. Pli paucs accidents hai percunter dà cun peduns.
In motivs principal per accidents saja vinavant in tempo memia aut. Qua na saja betg en mintga cas vegnì surpassà il tempo tenor lescha, mabain era il tempo che na saja betg stà adattà a las circumstanzas. Il dumber d'accidents entras distracziun saja s'augmentà cumpareglià cun l'onn avant. Sa reducids èn ils accidents pervi da l'alcohol, dentant haja dà dapli accidents pervi da drogas, scriva la polizia chantunala.
Sch'ins guarda sin la vegliadetgna, lura sa mussa che persunas tranter 20-29 onns èn stads il pli savens involvids en accidents. Il pli blers èn dentant be stà levblessads. Ils pli blers grevblessads hai dà tar persunas tranter 60-69 onns.
Facit entira Svizra: damain persunas mortas – dapli grevblessadas
En l'entira Svizra èn l'onn passà 214 persunas mortas tar accidents da traffic – 36 damain che l'onn avant. Il dumber da las persunas grevblessadas è creschì per 143 sin 3'935.
Tenor l'Uffizi federal per vias, Astra, sajan 11 da las unfrendas mortalas stadas persunas tranter 15 e 17 onns che gievan cun töfs e töffins. Per quest motiv elavurescha l'Astra mesiras sco adattaziuns tar la scolaziun u in augment da la vegliadetgna minimala.
Tar ils accident cun auto è il dumber d'unfrendas sa reducì per 22 persunas sin 59. Tar accidents cun e-bikes èn 586 persunas vegnidas blessadas grevamain, quai che correspunda ad in augment da 53 persunas.
