Tar l'examinaziun patologica da l’animal n'han ins betg mo chattà in tumor en il lom, mabain era duas blessuras da sajet. Vi da la chomma davant dretga han ins chattà rests da metal, che sa cunfan cun fragments d’ina balla. Questa blessura aveva manà ad ina noda visibla. Vitiers ha insatgi probablamain gì sajettà cun ballins sin la luffa, scriva l'uffizi da chatscha.
L’avust passà aveva la surveglianza da chatscha stuì sajettar la probablamain pli veglia luffa da la Svizra en la vischinanza da Haldenstein. Ella era smagrida fermamain. La femella F07 era sa trategnida en la vischinanza dals abitadis, ed a chaschun da plirs inscunters cun persunas n'aveva ella demussà nagina reacziun da fugia pli. A maun da la caracteristica da colur individuala ch'ins ha constatà vi da la chomma davant dretga, han ins pudì identifitgar la luffa. Cun ina vegliadetgna excepziunala da pli che 13 onns era ella probablamain il pli vegl luf vivent en Svizra.
Dal Vallais en il Grischun
Il zercladur 2011 han ins pudì cumprovar emprims fastizs da la luffa F07 en il Vallais Sura. Dapi l'atun 2011 ha la luffa vivì en il chantun Grischun ed è vegnida enconuschenta il 2012 sco fundatura da l'emprim triep da lufs al Calanda. Quest triep ha existì fin l'onn 2019. Pli tard era ella vegnida fotografada d'ina trapla fotografica en cumpagnia d'in luf mastgel. La stad 2023 dentant era la femella mo anc en gir suletta giu en il fund da la val.