Ils 3 da mars elegia il suveran da la terz gronda vischnanca dal Grischun, la vischnanca da Landquart, in nov president. Sepp Föhn, il president en uffizi, dat giu ses post per la fin da l'onn 2024, suenter bun 10 onns en uffizi. Per il sez datti in cumbat tranter la Partida populara e la Partida socialdemocrata. In duel tranter Martin Heim (PPS) ed Andreas Thöny (PS).
Martin Heim vul ina midada da generaziun
Martin Heim ha 37 onns e lavura sco responsabel per material rullant tar la Viafier retica. Sia carriera en la politica communala ha cumenzà en la cumissiun da scola da Landquart. Dapi il 2019 è el en la suprastanza communala e dapi il december en il Cussegl grond. Quai perquai ch'el è suandà a Roman Hug ch'è vegnì elegì sco cusseglier naziunal.
Per Martin Heim dovri en la vischnanca da Landquart ina midada da generaziun. El descriva sasez sco famigliar, giuven, dinamic e di ch'el haja in ferm liom cun la vischnanca. Cunquai ch'el saja gia en la suprastanza communala saja el gia infurmà ed enconuschia las tematicas actualas, uschia possia el prender a maun ils temas tant pli svelt. Martin Heim vul surtut s'engaschar per las scolas, gistadad, per in'administraziun effizienta e tegnair bas la chargia fiscala. Ina gronda sfida per ils proxims onns vesa el tar la planisaziun da las zonas.
Andreas Thöny vul persvader cun experientscha
Andreas Thöny ha 55 onns. El è stà blers onns en la suprastanza communala ed en il Cussegl grond. Latiers è el stà engaschads en divers gremis, tranter auter en il cussegl administrativ da la Viafier retica. Andreas Thöny è manader da l'uffizi per societad da la citad da Cuira. El ha gia candidà duas giadas per il presidi da Landquart. Tranter auter era cura che Sepp Föhn è vegnì elegì. Lura era el sa retratgs da la politica communala, era pervia da la limita dal temps d’uffizi. Andreas Thöny vesa surtut sia experientscha politica ed era da manar sco avantatgs. El descriva sa sez sco communicativ, cun ina ureglia averta e orientà a soluziuns. Andreas Thöny vul s'engaschar per dapli innovaziun, scolaziun e dapli raits en l'economia, per medemas schanzas per ils uffants e per che la vischnanca fa in pass envers la neutralitad dal clima.
Allianza dal Center n'ha betg in candidat
Tenor Sepp Föhn, il president en uffizi, n'haja l'Allianza dal Center betg chattà in candidat u ina candidata che vul surpigliar actualmain il post. Sepp Föhn vesa tar omadus candidats las fermezzas ed els sajan omadus valabels candidats. L'Allianza dal Center sco era la partida liberaldemocratica han dentant exprimì lur sustegn per il candidat da la PS, Andreas Thöny.
