Siglir tar il cuntegn

Landquart Nov center da dieta dal Plantahof avra sias portas

Il nov center da dieta dal Plantahof a Landquart è ufficialmain avert. Grazia a l'infrastructura moderna duaja il center agricul Plantahof daventar anc pli impurtant per il Grischun, ma era sur ils cunfins chantunals ora.

La cussegliera guvernativa, Carmelia Maissen, ed il president guvernativ, Marcus Caduff, han uffizialmain surdà las clavs per las novas localitads al Plantahof. Ils ultims trais onns è il center da scolaziuns e dieta – che cumpiglia ina sala, ina cuschina ed in alloschi – vegnì renovà e modernisà en etappas.

Il Plantahof è la patria emoziunala da l'agricultura grischuna.
Autur: Marcus Caduff president guvernativ

A l'avertura ha il president guvernativ, Marcus Caduff, anc punctuà ina giada l'impurtanza ch'il Plantahof ha per l'agricultura grischuna. Quel exista gia dapi 120 onns. Grazia a la nova infrastructura saja il center da dieta uss adattà als basegns actuals dals utilisaders e las utilisadras e bain semtgà per l'avegnir, ha la cussegliera guvernativa, Carmelia Maissen, agiuntà.

La infrastructura moderna porschia era novas perspectivas per la furmaziun dals purs e las puras da l'avegnir, ha declarà il dirctur dal Plantahof, Peter Vincenz.

Investiziuns da milliuns per il futur

Suenter ch'il center da dieta è vegnì utilisà durant 40 onns saja stà nairas uras per la modernisaziun, scriva il chantun. Las localitads correspundian uss a las pretensiuns da las lescha d'energia, d'ambient, da segirezza e d'inclusiun. Custà ha questa modernisaziun 24,5 milliuns francs. Ella fa part d'in plan da master da l'onn 2008. Sin fundament da lez hai gia dà ulteriuras midadas sin l'areal Plantahof dapi il 2008.

Plan da master dal 2008 per l'areal Plantahof

Avrir la box Serrar la box
  • in nov auditori (2010)
  • ina sanaziun da la chascharia (2012)
  • ina nova stalla per animals gronds (2013)
  • ina nova butia purila (2018)

Ed ils ultims trais onns è pia la renovaziun dal center da scolaziun e dieta vegnida realisada:

  • Il suveran dal Grischun ha il favrer 2020 dà glisch verda al project cun in cler Gea.

Interessents ed interessentas pon visitar il nov center da dieta a Landquart la sonda, ils 24 da matg da las 10.00 fin las 15.00, al di da las portas avertas. L'uffizi da construcziun auta grischun organisescha guids tras las novas localitads ed ils visitaders e las visitadras pon empruvar divers products da bainpuril.

Or da l'archiv:

RTR actualitad 17:00

Artitgels legids il pli savens