Gia per la novavla giada è Theo Cavegn a Tavau per far installaziuns electricas per il WEF. Radund 50 persunas èn durant emnas u per part schizunt mais vi d'installar en il center da congress tut l'electricitad. I dovra bleras installaziuns provisoricas, cunquai ch'i vegn er installà paraids ed entiras stanzas provisoricas per il WEF.
Ina lavur da mais
L'electricist da Breil è gia dapi ils 10 da december en acziun cun ses team. Pass per pass e stanza per stanza vegn installada. Els sajan dentant propi mo responsabels per l'electricitad, installaziuns da multimedia per exempel televisiuns, vegnan installadas d'in'autra firma.
Ina firma franzosa vegn cun 200 fin 300 collavuraturs per installar paraids provisoricas – sco culissas ston ins s'imaginar quai. E lura avain nus in plan per mintga stanza e stuain lura installar ils cabels e las bischlas.
I vegn duvrà enorm blera electricitad durant quests paucs dis e tut sto funcziunar senza incaps. Perquai datti er mesiras da segirezza per il cas che l'electricitad croda or, per exempel cun agregats da diesel. Quai è fitg impurtant cunquai er la polizia è dependenta da las installaziuns che Theo Cavegn fa cun ses team.
Mintgina e mintgin vegn controllà
Spezial n'è dentant betg mo il quantum d'electricitad e la segirtad dal provediment, mabain las mesiras da segirezza tar l'installaziun. L'entir temp èn l'armada e la polizia da viadi, er cun chauns, per far controllas. E sa chapescha vegnian er tuts lavurers controllads gia ordavant. Sch'insatgi ha ina giada gì da far cun la polizia na possia quella persuna betg vegnir a far questa lavur, uschia Theo Cavegn.
Durant l'entir bajegiar si cursescha la polizia ed il militar cun chauns per controllar che tut saja segir.
Avant in pèr onns ha l'electricist da 57 onns pudì far il pichet durant il WEF. Quai saja propi sta fitg spezial. Ina giada è el vegni clamà dal team dal president dals Stadis Unids Donald Trump pervi che la segiranza era crudada or durant il ensolver. Aifer diesch minutas aveva el schlià il problem e schizunt pudì discurrer in pèr pleds – cun ses mal englais sco el di sez – cun Donald Trump.
