Siglir tar il cuntegn

Header

video
Resistenza cunter indrizs per energia regenerabla sin territoris protegids
Or da Telesguard dals 02.02.2023.
laschar ir. Durada: 2 minutas 51 Secundas.
cuntegn

Lescha d'energia Organisaziuns d'ambient s'engaschan per la protecziun da biotops

Il Cussegl dals chantuns ha decidì ch'i duai era esser pussibel da bajegiar indrizs per energia en territoris protegids. Ils uschenumnads biotops da muntada naziunala.

Bun 2% dal territori svizzer vala sco territori ch'è dal tuttafatg sut protecziun e nua ch'ì na dastga betg vegnir bajegià. Quai èn ils biotops da muntada naziunala e da quels datti era en il Grischun 1'400.

audio
Appel per la protecziun da biotops
ord Actualitad dals 02.02.2023. Maletg: RTR
laschar ir. Durada: 3 minutas 15 Secundas.

Il Cussegl dals chantuns vul uss dentant lubir d'era fabritgar en quels spazis indrizs d'energia regenerabla, sche quels èn da relevanza naziunala. Per che quai na chapita betg appellescha l'allianza per la protecziun da biotops cunzunt al Cussegl naziunal da reagir. Lez vegn numnadamain pli probabel a discutar en la sessiun da primavaira davart la lescha d'energia.

La producziun supplementara d'electricitad sto avair lieu, ma betg en questas perlas da protecziun prioritara naziunala.
Autur: Duri Bezzola President Pro Lej da Segl

L'allianza argumentescha ch'i duai era esser pussibel da midar las energias cun proteger ils biotops. Unfrir ils biotops sin donn a cust da la protecziun dal clima, saja cuntraproductiv. I dettia avunda schliaziun per optimar e reducir il niz d'energia, quai per exempel tras energia solara sin infrastructuras existentas, tras forza idraulica e cun indrizs en lieus betg protegids sco sin la Motta Naluns.

RTR actualitad 17:00

Artitgels legids il pli savens