Siglir tar il cuntegn

Header

audio
Markus Solinger: «Jau sun in Rumantschun»
Or da Actualitad dals 25.04.2023. Maletg: RTR
laschar ir. Durada: 5 minutas 16 Secundas.
cuntegn

Lia Rumantscha Markus Solinger è il nov secretari general

La suprastanza da la Lia Rumantscha ha elegì Markus Solinger sco nov secretari general. El entra en uffizi il 1. d'avust. El vegn cun quai ad esser il successur da Diego Deplazes, che ha demissiunà l'onn passà.

Il secretari general novelegì Markus Solinger vegn oriundamain da Scuol, ma viva actualmain a Maur en il chantun Turitg. L'um da 55 onns è econom, fin ussa è el stà il manader dal marketing e da la scolaziun da l'Associaziun svizra da l'industria da gas. En la Rumantschia n'è el betg anc fitg enconuschent.

video
Markus Solinger – il nov secretari general da la LR
Or da Telesguard dals 25.04.2023.
laschar ir. Durada: 3 minutas 5 Secundas.

Suprastanza satisfatga

Solinger haja la savida necessaria per manar in'operativa en in ambient cumplex, sias cumpetenzas s'accordian fitg bain cun ils champs d'acziun che la Lia stoppia elavurar en il futur, din las co-presidentas da la Lia Rumantscha Urezza Famos e Gianna Luzio en ina communicaziun.

La suprastanza da la Lia Rumantscha saja satisfatga da pudair preschentar ina persuna versada en divers champs sco nov manader operativ. Markus Solinger vegnia da l'economia cun in accent sin marketing ed informatica ed è fitg motivà da promover il rumantsch en connex cun il svilup e la communicaziun digitala. Er la situaziun linguistica en il Grischun, ma er en la diaspora enconuschia el bain, uschia la co-presidenta Gianna Luzio vinavant.

audio
Co-presidenta Gianna Luzio declera il process da la tschertga
ord Actualitad dals 25.04.2023. Maletg: RTR
laschar ir. Durada: 3 minutas 31 Secundas.

Intensivar communicaziun

Sco ch'il nov secretari scriva, vesa el la Lia Rumantscha sco center da cumpetenza che pussibilitescha e promova il svilup da la Rumantschia. Sco secretari general veglia el intensivar la communicaziun interna ed externa.

La funcziun sco secretari general da la Lia Rumantscha ma permetta dad esser pli datiers da mias ragischs e da tgirar e sviluppar noss stgazi cultural – il rumantsch.
Autur: Markus Solinger Secretari general novelegì
video
Markus Solinger en l'intervista davart sias finamiras
Or da Telesguard dals 25.04.2023.
laschar ir. Durada: 2 minutas 59 Secundas.

Solinger cumenza sia lavur il 1. d'avust, sco dapi il december resta Andreas Gabriel vinavant ad interim il secretariat general.

Successur da Diego Deplazes

Solinger succeda a Diego Deplazes che aveva annunzià l'october da l'onn passà ch'el sa retira da ses post suenter var dus onns. Deplazes è dapi l'avrigl da quest onn il manader da fatschenta da la Crusch Cotschna Svizra dal chantun Grischun. Suenter la demissiun da Deplazes aveva la suprastanza installà ina gruppa da lavur per elavurar il profil e tschertgar in successur u ina successura.

La Lia Rumantscha ed il secretari general

Avrir la box Serrar la box

La Lia Rumantscha LR è l'organisaziun da tetg da las uniuns linguisticas e culturalas rumantschas, tranter auter las trais uniuns regiunalas Surselva Romontscha, Uniun Rumantscha Grischun Central e l'Uniun dals Grischs.

La LR sustegna las activitads da las uniuns affiliadas ed ha in mandat federal e chantunal per la promoziun da la lingua e cultura rumantscha e porscha servetschs d'utilitad publica.

Cun quai ha il secretari general, ch'è la represchentaziun uffiziala ed il manader da fatschenta da la Lia Rumantscha, ina posiziun clav en la Rumantschia.

In vallader al timun

Solinger vegn ad esser il 12avel secretari general da la Lia Rumantscha. Tradiziunalmain vegn il secretari general plitost da la Surselva entant ch'il presidi è en mauns ladins. Cun Solinger da Scuol vegn ussa per l'emprima giada dapi ils onns 50 il secretari da l'Engiadina. La regiun rumantscha la pli gronda n'è cun quai represchentada ni en il presidi ni en il secretariat general.

Ils secretaris generals da la Lia Rumantscha

Avrir la box Serrar la box
  • 1919-1932 Steafan Loringett
  • 1932-1938 Andrea Schorta
  • 1949-1954 Jon Pult
  • 1960-1968 Giachen Giusep Casaulta
  • 1968-1978 Hendri Spescha
  • 1978-1980 Iso Camartin
  • 1980-1980 Hans Caprez (elegì, sa retratg avant il cumenzament da l'uffizi)
  • 1980-1997 Bernard Cathomas
  • 1997-2007 Gion Antoni Derungs
  • 2007-2017 Urs Cadruvi
  • 2017-2021 Martin Gabriel
  • 2021-2023 Diego Deplazes

Ils presidents e las presidentas

Avrir la box Serrar la box
  • 1919-1945 Giachen Conrad
  • 1946-1963 Steafan Loringett
  • 1963-1964 Andrea Bezzola
  • 1964-1977 Pierin Ratti
  • 1977-1984 Romedi Arquint
  • 1984-1991 Toni Cantieni
  • 1992-1996 Chasper Pult
  • 1997-2003 Jost Falett
  • 2004-2012 Vincent Augustin
  • 2013-2015 Duri Bezzola
  • 2016-2022 Johannes Flury
  • 2022- Urezza Famos e Gianna Luzio

RTR novitads 10:00

Artitgels legids il pli savens