«Nossa organisaziun ha anc adina las medemas structuras sco en il temp nua che quai na deva ni telefonins ni internet, quai na tanscha cleramain betg pli», ha Gianna Luzio, la co-presidenta da la Lia Rumantscha ditg a chaschun da la radunanza da delegads da la Lia Rumantscha. Quai sut la tractanda «orientaziun davart finamiras 2024». Perquai saja uss dad «unir las forzas e da chattar novas vias dad esser en contact cun tut las Rumantschas ed ils Rumantschs en l'entira Svizra.» Transfurmar muntia dentant betg, dad en emprima lingia rumper structuras ubain l'organisaziun da la LR. «Nus na vulain betg far ina revoluziun, dentant reponderar la moda e maniera co nus pudain defender noss interess, collavurar e mussar a dapli Rumantschas e Rumantschs tge lavur che la LR fa.»
Nus vulain unir las forzas e chattar novas vias per il dialog cun tut las Rumantschas ed ils Rumantschs en l'entira Svizra.
Co quai duai ir, duai en il futur ina gruppa da lavur cun ils trais commembers da la suprastanza Urezza Famos, Donat Nay e Patric Vincenz elavurar. Sco emprim vegnan els a far in'analisa per lura preschentar propostas. «Dentant quai dovra in zic temp per chattar ina buna schliaziun», agiunta Luzio.
Profil per secretari sa mida
Cunquai che Diego Deplazes ha dacurt demissiunà sco secretari general, sto la LR ir a la tschertga d'ina nova persuna. Tge profil che vegn tschertgà, na pon las co-presidentas dentant er anc betg tradir. Segir è: «Nus na vegnin betg a far copy paste cun l'inserat da la plazza da Diego Deplazes, mabain nus vegnin ad elavurar in nov profil», di Urezza Famos. Er quai duai ina gruppa da lavur far, in plan da temp na dat quai dentant anc betg: «Cura ch'il process è uschè lunsch vegnin nus a preschentar l'inserat.»
Nus na vegnin betg a far copy paste cun l'inserat da l'ultima giada.
Per il temp transitoric entant che la nova persuna è tschernida, chatta la suprastanza da la Lia Rumantscha en ina sesida ils 10 da november ina schliaziun – ina pussaivladad è, che Andreas Gabriel, il vize-secretari surprenda enfin che la nova persuna cumenza.
Tge che las uniuns affiliadas giavischan
Er las uniuns affiliadas da la Lia Rumantscha han udì gugent il plan da transfurmar la Lia Rumantscha. Ellas n'han anc betg ponderà en detagl co lur uniuns pudessan profitar da la tranfurmaziun, dentant spontan vegn endament ad els in u l'auter giavisch. Simona Demarmels, presidenta da l'uniun Rumantscha Grischun Central giavischa per exempel, che la collavuraziun cun las promoturas ed ils promoturs en las regiuns restia: «Nus avain ina buna collavuraziun e profitain era bler da quella.»
Per Victoria Mosca, presidenta da l'Uniun dals Grischs fiss quai impurtant, ch'ins guardia bain tgi che ha tge fermezza e tge pensum. «I ha tant tar la Lia sco er tar las uniuns affiliadas dà bleras midadas ils ultims onns, uss èsi da chattar in l'auter e da guardar tgi che ha tge fermezzas, per evitar ch'ins fetschia lavur dubla.»
Er Toni Vinzens, president da la Surselva Rumantscha beneventa ina midada, fa dentant attent da far ina transfurmaziun che promova structuras pli simplas e betg pli cumplitgadas. E: «Forsa ch'ins pudess er meglierar in zic la communicaziun tranter la Lia e las uniuns affiliadas», agiunta el in giavisch.
Activitads e preventiv 2023
Ulteriuras tractandas èn stadas las activitads ed il preventiv per l’onn 2023. Ils accents da l’onn 2023 cumpiglian tranter auter il rinforzament da las cuminanzas en la diaspora sco er la digitalisaziun respectiv la realisaziun d'ina strategia per digitala rumantscha. En connex cun il giubileum dad 85 onns rumantsch sco lingua naziunala il 2023 vul la Lia Rumantscha rinforzar la preschientscha dal rumantsch sin champ naziunal.
