Urezza Famos e Gianna Luzio han gì gia avant lur tscherna il sustegn da las trais uniuns affiliadas regiunalas da la Lia Rumantscha. Quellas avevan er proponì ellas per la successiun da Johannes Flury. Flury aveva demissiunà suenter esser stà durant sis onns a la testa da la Lia Rumantscha.
Las delegadas ed ils delegads da la Lia Rumantscha han elegì cun 42 vuschs ed ina abstinziun il nov co-presidi.
Duo che sa cumplettescha
Cun l’Engiadinaisa Urezza Famos e Gianna Luzio da Savognin cun ragischs en Surselva represchentian las duas novas co-presidentas da la Lia Rumantscha er ils differents idioms. Ultra da quai è la cussegliadra da cultura ed editura dal magazin Piz, Urezza Famos, che viva tranter Turitg e l’Engiadina er da chasa er en l’economia. Gianna Luzio che pendulescha tranter Berna e Savognin lavura sco secretaria generala da l’Allianza dal Center ed enconuscha perquai er bain il mund politic. Tuttas duas han menziunà il rumantsch sco lur lingua da cor.
Gianna Luzio (41), oriunda da Savognin, è dapi il 2018 secretaria generala da la PCD – oz è quai l’Allianza dal Center (AdC). Avant è ella stada durant tschintg onns referenta tar il Departament federal da l’intern da cusseglier federal Alain Berset. Ella è stada engaschada tranter auter per il Festival cultural Origen e tar il Parc Ela. A Berna, nua ch’ella viva ussa, è ella presidenta dal cussegl da fundaziun dal «Museum alpin svizzer».
Urezza Famos (58), oriunda da Scuol, è interprendidra, cussegliadra en dumondas da cultura e da communicaziun, editura e mamma. Tranter auter ha ella co-fundà, inizià u manà interpresas sco l’Acla da fans, il Magazin Piz, l’Hotel Piz Tschütta ed il Center d’art contemporan Nairs. Ella è mamma dad in figl da 16 onns e viva tant ad Uetikon am See (ZH) sco era en Engiadina Bassa.
Reelecziun da la suprastanza
La radunanza generala da la Lia Rumantscha ha ultra da quai reelegì per ulteriurs trais onns ils suprastants Angela Jann, Donat Nay e Roman Pfister. Patric Vincenz remplazza Gion Capeder che ha gì da chalar causa limitaziun dal temp d’uffizi.
Or da l'archiv:
Il 1975 ha «il balcun tort» preschentà las finamiras da la Lia Rumantscha
