Siglir tar il cuntegn

Header

audio
Urezza Famos: Il profil per in nov secretari general da la LR
Or da Actualitad dals 09.12.2022. Maletg: RTR, Anna Caprez
laschar ir. Durada: 9 minutas 30 Secundas.
cuntegn

Lia Rumantscha Transfurmaziun – ma a la moda veglia

Avant dus mais ha Diego Deplazes annunzià ch'el sa retira sco secretari general da la Lia Rumantscha. Lura avevan las co-presidentas Urezza Famos e Gianna Luzio n'anc betg pudì tradir, cun tge profil exact che vegn tschertgà la successura u il successur. Tge ch'è dentant vegnì ditg lura:

Nus na vegnin betg a far copy paste cun l'inserat da la plazza da Diego Deplazes, mabain nus vegnin ad elavurar in nov profil
Autur: Urezza Famos Co-presidenta Lia Rumantscha

Per far quai ha la Lia incumbensà ina gruppa da lavur. Ussa è il nov inserat publitgà. Sa midà è dentant pauc vi dal text. Urezza Famos ha dà respostas davart la nova plazza e lur spetgas ad in candidat u ina candidata a RTR:

Sch’ins cumpareglia ils dus inserats per il post, quel d’avant dus onns e quel actual, lura dat en egl ch’i na dat betg grondas midadas. N’è l’inserat nov damai betg bunamain ina copia?

Pitschnas midadas pon avair mintgatant in grond effect per in’interpresa. Nus avain ussa integrà che nus tschertgain insatgi ch’ha propi l’abilitad en connex cun il svilup dad ina gestiun, nus avain integrà la transfurmaziun, nus giavischain abilitads per il marketing e nus giavischain in sensori per las gruppas che nus avain ussa cun las novas pretensiuns che vegnan vers la LR, sco p.ex. en la diaspora.

Il co-presidi da la Lia Rumantscha, Gianna Luzio ed Urezza Famos (da sanester a dretg)
Legenda: Il co-presidi da la Lia Rumantscha, Gianna Luzio ed Urezza Famos (da sanester a dretg) RTR

Èn quai ussa propi novas abilitads? U n’eran quai betg qualitads che anteriurs secretaris da la LR avevan er d’avair?

Nus avain realisà che fitg bleras persunas associeschan la plazza da secretari u da secretaria generala cun ina persuna ch’ha d’avair in’auta cumpetenza linguistica. Ma quellas cumpetenzas avain nus en chasa. Diversas persunas dian ch’ellas na sajan betg romanists u romanistas. Ed exact quai vulevan nus mussar cun quest inserat. Nus vulain avrir l’artg da las cumpetenzas e guardar tgi ch’ademplescha quellas cumpetenzas. Nus vulain avrir uschè lartg sco pussaivel per pussibilitar er a persunas che n’han forsa betg mo cumpetenzas linguisticas da s’interessar per la plazza.

Sin tgenins puncts guardais Vus per selecziunar in candidat u ina candidata?

Segir vegn jau a guardar sin la cumpetenza da manar ina fatschenta da 22 emploiadas ed emploiads. I sto esser insatgi che ama la cultura rumantscha, insatgi ch’ha in’affinitad per quella, insatgi ch’ha gugent la lingua rumantscha, insatgi ch’è gugent tranter Rumantschas e Rumantschs ed als chapescha. I fiss bun sche quai fiss insatgi che va era gugent sur ils cunfins rumantschs ora. In da mes giavischs fiss era ina persuna ch’è ferma en il champ da marketing, perquai che la LR vuless daventar visibla cun sia lavur. Ed insatgi ch’ha in’affinitad digitala. Mia glista da giavischs è damai gronda e lunga...

Datti insatgi che vegn d’ademplir tut quels puncts?

Quai vegn ad esser la gronda dumonda. Nus sperain da chattar quella persuna.

RTR actualitad 12:00

Artitgels legids il pli savens

Scrollar a sanestra Scrollar a dretga