Sin 2'000 meters sur mar duess quai project vegnir realisà. L’implant solar sa stendess final sur ina surfatscha da ca. 150’000 meters quadrats. I duain vegnir installads 25'000 fin 30'000 moduls solars. Quai pudess porscher avunda electricitad per fin 5'000 chasadas.
La Confederaziun sustegna indrizs solars gronds che vegnan construids fin il 2025 cun fin 60% dals custs per l'indriz. En quest cas quinta la vischnanca da Claustra cun in sustegn da fin 20 milliuns francs. Las investiziuns da la vischnanca sajan tar var 40 milliuns francs per tut il project.
Segirar provediment
Cun l'implant solar vul la vischnanca da Claustra gidar a segirar il provediment d'energia naziunal. Plinavant pudess l’ovra proveder electricitad durabla per las pendicularas sco era per in grond dumber da chasadas.
Il lieu tschernì per l'implant saja ideal. I dettia gia infrastructura da transport. Plinavant sa chatta en quella regiun gia in territori da skis (Madrisa), uschè che la cuntrada na vegn betg duvrada per l'emprima giada. Plinavant duai l'agricultura pudair nizzegiar vinavant il terren. Igl è numnadamain planisà, che las cellas solaras vegnan installadas 2 fin 3 meters sur il terren.
Co vinavant?
Fin che la procedura da permissiun è instradada, ston anc vegnir superads intgins obstachels politics e tecnics. Ultra dal parlament communal e da las votantas e dals votants è er la radunanza da burgais responsabla per l'avegnir da quest grond stabiliment. La votaziun è planisada per ils 22 d'october 2023.
Sche tut va tenor plan, cumenzassan las lavurs da construcziun durant la primavaira 2025. Energia vegniss furnissan las emprimas cellas solaras vers la fin dal 2025. Fin che tut l'indriz è construì a fin duai cuzzar fin la fin dal 2027.