Il suveran da Laax ha dà ses consentiment a l'Arena alva ed a la Repower da realisar in implant solar al pe dal glatscher dal Vorab. Quai ha el fatg cun lubir a la suprastanza da ceder a las duas interpresas ina surfatscha da 150'000 meters quadrats en dretg da construcziun.
L'ovra cun ina prestaziun da 7,5 mega watt duess producir electricitad per 2'200 chasadas, e radund 12 gigawatt uras per onn. Cumpradra principala vegn l'Arena Alva ad esser. Las duas interpresas pon uschia cuntinuar cun il project e l'Arena Alva è in pass vinavant cun sia finamira da daventar l'emprima destinaziun turistica cun in provediment autonom d'energia.
Ch'i va uschè spert n'avess jau betg pensà, ma Laax ha ina tscherta agilitad.
Bain ch'il suveran è stads cun 164 encunter 7 vuschs per il project, hai dà ina discussiun pertutgant il tschains che la vischnanca survegn tenor contract da dretg da construcziun. Il tschains minimal da 0,2 raps per l'ura kilowatt era per tscherts memia bass.
Il president communal da Laax, Franz Gschwend, ha detg che la vischnanca vegnia anc a discutar il tschains, cura che l'indriz solar genereschia in gudogn. Quest conferrmescha era il mainafatschenta da la Repower, Roland Leuenberger.
Las emprimas negoziaziun vegnan cura che nus avain in quint da gestiun che preschenta in gudogn.
La Repower e l'Arena Alva vulan anc quest onn inoltrar ensemen cun la Flims Electric sco manadra dil project la dumonda da bajegiar. Suenter ina fasa da test davent da quest atun, duain las lavurs per l'implant solar cumenzar la primavaira 2025. Il squitsch è gronds, perquai che minimum 10 % dal implant ston producir electricitad sin la fin da l'onn 2025, sche las possessuras vulan profitar da las subvenziuns federalas.
Irina Beer è nova suprastanta
La radunanza communala ha elegì tras scrutini e cun gronda maioritad Irina Beer sco nova suprastanta. Ella succeda a Marita Buchli che finescha l'uffizi pervia da la limitaziun dal temp d'uffizi suenter 12 onns. En la radunanza da l'avrigl vargà na aveva la vischnanca betg chattà ina successura u in successur per la suprastanta partenta. Tar questa elecziun han las votantas ed il votants pudì eleger tranter trais candidats.
Nova plazza da sport e da pausa
Suenter plirs onns stuair desister dil «plaz cotschen» san las scolaras ed ils scolars da Laax sa legrar sin ina nova plazza da sport e da pausa en vischinanza dal lai. Il suveran ha suenter ina discussiun sch'il lieu saja adattà per la plazza, approvà il credit da 300'000 francs cun 118 encunter 47 vuschs. Planisà è da cumenzar cun las lavurs quest atun per pudair serrar giu quellas la primavaira en in onn.
Nagin success ha percunter il project da transfurmar la «veglia scoletta» da Laax en in café e restaurant gì. Il concept na ha betg pudì persvader ed las votantas e votants han renvià tal cun 99 vuschs encunter 64.
