Sonda è vegnì approvà a Laax il quint communal e quai unanimamain. Quel serra tar entradas da 25,3 milliuns cun in gudogn da 5,7 milliuns francs. Il quint d'investiziuns serra cun expensas totalas da 14 milliuns.
L'emprima radunanza suenter la fusiun refusada
Durant la radunanza han ins sentì nagut dal cumbat vehement per u encunter ina fusiun avant la votaziun da la fin schaner. Tar tut las tractandas hai dà naginas u mo curtas discussiuns.
Jau sun cuntent cun l'andament da la radunanza. Quai è stada l'emprima radunanza suenter la votaziun da fusiun. Las discussiuns èn stadas correctas e quai è bun uschia.
Cun 87 cunter 63 vuschs ha la radunanza decidì da spustar la revisiun da la constituziun communala. Questa revisiun avess previs d'introducir da nov la votaziun a l’urna per projects u investiziuns sur dus milliuns francs. La fatschenta duai ussa vegnir tractada a chaschun da la revisiun totala da la constituziun communala che stat sin ruca.
Tenor turnus avess la radunanza gì d'eleger dus commembers en la suprastanza communala. Il suprastant actual Beat Camathias è alura era vegnì reelegì cun 141 da 160 vuschs. Per la suprastanta Marita Buchli che sto terminar l'uffizi pervia da la limitaziun dal temp d'uffizi hai dà naginas propostas. Quai saja ina situaziun penibla per la vischnanca da Laax, ha in convischin ditg silsuenter.
Quai n' è betg il maletg che Laax vul mussar. Enfin uss avain nus adina pudì occupar ils posts en suprastanza. Quella giada n'hai betg funcziunà
La fusiun renviada è strusch vegnida tematisada en la radunanza. Mo curt ha il president communal menziunà la fatschenta en ses rapport annual.
Suenter la radunanza è la populaziun stada envidada ad in apero ed ina tschaina communabla. Ina emprima schanza d'almain cumenzar cun in dialog in cun l'auter.
