La Magistraglia Grischun ha en il rom dal plan d'acziun naziunal inoltrà ina petiziun che duai segirar la qualitad da furmaziun. En tut hajan 4200 persunas suttascrit quella e surdà a la vicepresidenta dal Cussegl grond Silvia Hofmann.
La petiziun pretenda dal Cussegl grond e da la regenza grischuna dad examinar intginas propostas e da prender si quellas en la revisiun da la lescha, sco per exempel dapli temp per la promoziun da l'uffant, distgargiar scolastas e scolasts u pajas cumpetitivas.
Tuttas mesiras proponidas:
- dapli temp per la promoziun da singuls uffants
- reducir la chargia da lavur da las persunas d'instrucziun
- furmaziun optimala
- pajas cumpetitivas
- dapli sustegn da pedagogia curativa en ambient integrativ
- material didactic actual en tuttas linguas chantunalas
L’emprima proposta dal chantun era insumma betg progressiva. Nus duvrain bler meglras soluziuns per nossas scolas – nus vulain far squitsch.
La proposta che la regenza ha preschentà l'atun per la revisiun da la lescha n'haja betg cuntegnì mesiras impurtantas per far frunt a la mancanza da scolastas e scolasts, scriva la magistraglia grischuna en sia communicaziun. La mancanza da persunas d'instrucziun pericliteschia la qualitad d'educaziun en Svizra – e quai saja en in ulteriur pass er in privel per il Grischun sco lieu da lavur.
Jau ves che la situaziun en scolas rumantschas e talianas en il Grischun è pli pregnanta ch'en scolas tudestgas. Dentant vesan ins che la situaziun daventa era là pli tendida, onn per onn.
